TNLA ni hpang de Myen hpyen hpung ni sinat kaba matut manoi gap bun
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra, TNLA ni nga ai Nkang Bum, Malun Bum, Law Hkum Bum maga de May shata 31 ya jahpawt hkying 7:00 am aten daram kaw nna, Myen hpyen Dap, Dapnu 99 kata na hpyen hpung ni sinat kaba matut manoi gap bun ai lam na chye lu ai.
Myen Hpyen Dap, Dapnu 99 kata na hpyen n gun 50 daram gaw Namhpakka hte Malun mare makau kaw nna, TNLA ni nga ai maga de sinat kaba matut manoi gap bun nga ai lam, Namhpakka Sinpraw hkran buga na Shadang Ja Di tsun dan ai kaw na chye lu ai.
Ya na zawn Myen Hpyen Dap ni sinat kaba hte hkrup mara gap bun ai majaw, De Oo Sun mare nnan kaw nga ai mungshawa htinggaw 40 daram gaw Malun mare de jahkring mi wa hprawng yen mat ai re, mare masha ni hkra hkala ai lam gaw nnga ai nga nna Shadang Ja Di matut tsun ai kaw na chye lu ai.
May shata 29 ya shani hta mung, Kuthkai, Namhpakka, Namgut mare hte Shu Hkyin Ta makau kaw Myen hpyen dap hte TNLA ni gasat gala majan byin ai lam chye lu ai.
