Wa Ra Zup mare makau kaw nga ai Myen hpyen hpung ni laiwa laisa mung mare masha ni hpe sawk jep
Danai Lidu lam Wa Ra Zup mare makau kaw dap jung shara la nga ai Myen Hpyen Dap Hk.L.Y 297 dap na hpyen hpung ni gaw, laiwa laisa mung mare masha ni hpe laja lana sawk jep nga ai lam buga masha ni tsun nga ma ai re.
“Laiwa laisa masha ni hpe shagyeng ai, mare de tsa la shangun, simai simaw zawn re ni la shangun ai gaw teng ai” nga nna Wa Ra Zup mare na Salang langai tsun dan ai.
Ndai Myen hpyen hpung ni gaw, shinggan manam masha ni hpe rai jang grau nna sawk jep ai lam galaw ma ai, June shata praw 1 ya shana gaw, sinpraw maga Yuzana company Miwa ni galaw da ai mahkrai maga de mung bai shamu shamawt wa ai lam, Salang wa matut tsun ai kaw na chye lu ai.
May shata 29 ya shani hta gaw, KIA Dap Ba 2, Dap Dung 14 ginra, Nambyu mare kaw shara jahkrat nga ai, Myen Hpyen Dap, Hk.L.Y 105 dap ni, mungmare masha ni a Dumsu 20 jan hpe modo kaba (1) hte Myitkyina maga de htaw la kau ya ai lam, ginra shi sawk ni kawn chye lu ai.
