Covid-19 ana zinli a majaw Laiza ginra kata na Langu sun sin ai bungli masha ni sum machyi hkrum

Laiza ginra kata Mai Sak Pa mare makau na langu sun sin ai bungli masha ni Covid-19 ana zinli a majaw sum machyi hkrum nga ai lam, langu sun sin ai bungli galaw masha ni tsun ai kaw na chye lu ai.

Sun kaw na langu si ni hpe aten dep nlu kran la ai majaw, langu si nkau ni kaba lai myin lai nna langu si mari ai Miwa Lauban ni mung n mari la mat ai re.

“Ndai zawn shingra ana byin pru wa ai majaw hpa mung ndang di lu ai, hkawmsa hkawmwa hkrun lam ni pat da nna Modo ni mung nmai shang mat sai re majaw, aten lai nna langu si ni mung myin lai mat ai re, lau ban ni mung sum, tinang mung sum, htaning tsang 10 lung na Ma a jawng jarik pi gara hku tam la ra na re pi nchye mat sai” nga nna langu sun sin nga ai Ma Nan Phyu tsun ai.

Modo lam ni bai hpaw wa ai ten hta langu sun lauban ni bai sa wa nna lu ai daram langu si kran dut nhtawm, langu sun sin ai bungli galaw masha ni a bungli shabrai hpe lajang ya ai lam gaw nga ai re.

Sun madu lauban shanhte Mungdan de wa mat ai majaw bungli galaw shabrai nlu mat ai Ko Win Soe hpe san yu ai hta, “Ngai gaw Miwa ga mung nchye Jinghpaw ga mung nchye ai, ga gale ya ai wa hpe san shangun yu ai shaloi she lauban wa gaw bai nwa sai nga chye lu ai majaw hpa shabrai mung nlu dat ai. Dai majaw sun kata kaw nga taw ai naw kaja ai langu si ni hpe hkran la nhtawm lauban nnan tam nna lu ai manu hte dut kau ra sai” nga nna tsun ai.

Langu sun bungli gaw laning mi tup galaw ra ai bungli langai rai nna, galaw lu galaw sha nga ai bungli masha ni a matu maga mi hku nna sha pi madi shadaw ya lu ai re.

Mai Sak Pa mare gaw Laiza Muklum hte deng 4, 5 daram tsan ai shara rai nna, ndai Langu sun ni hta ginra masha ni galaw lu galaw sha ai shara re sha n-ga, kaga ginra Mogong, Hupin, Ta Law Gyi kaw na masha ni mung galaw sha nga ai shara re hpe chye lu ai.