Ma kaji ni hte Ma hkum kanu ni hpe ana makawp maga tsi htu ya

Mungshawa Hkamja Lam Makan Dap, Makawp Maga tsi branch ni woi awn nhtawm, Ginjaw Ginra Ginwang Ginjaw hte Sinpraw Ginwang Ginjaw kata na shara ni hta June shata praw 6 ya shani kaw nna Ma kaji ni hte Ma hkum kanu ni hpe ana makawp maga tsi htu ya ai lam galaw nga ai re hpe chye lu ai.

Ana makawp maga tsi htu ai bungli hpe shata lahkawng hta kalang galaw ai raitim, Covid-19 ana zinli a majaw, tsi htu ai masing hpe April, May shata lahkawng gan jahkring kau ai re. Ya na zawn ana nhkoi shi ai aten hta ana makawp maga tsi bai htu hpang ai yaw shada lam hpe Mungshawa Hkamja Lam Makan Dap Makawp Maga Tsi Yu Reng Du, Ura Naw tsun ai.

“Makawp maga tsi nhtu ai aten hpe galu kau dat ai raiyang, ana makawp maga tsi nhtu ai ma ni grai law wa ai re majaw, tsi nhtu ai ma ni kaw nna kaga kap bra ana zinli hpan mi bai jat wa na hkrit tsang ai majaw, ya na Covid-19 ana zinli nhkoi shi ai laman hta raitim mung, ana makawp maga tsi htu hpang ai lam hpe bai galaw wa ai re” nga nna tsun ai.

Madung gaw nnan shangai ai kaw nna laning mi npu na Ma kaji ni hpe ana makawp maga tsi htu ya ai lam galaw ai hte lam amyu myu a majaw tsi nlu htu shi ai laning mi npu na Ma ni hte Ma hkum kanu  ni hpe mung ana makawp maga tsi htu ya nga ai re.

Mung shawa ni gaw ana makawp maga tsi htu ai lam hpe shawngdaw na hta yawng chye na hkap la wa sai hpe mu lu ai, Covid-19 ana makawp maga ra ai aten laman ang ai re majaw, Mungkan Hkamja Dap kaw nna shale tawn da ai, tsi htu sa ra ai ni hkan sa ra ai lam masan hte maren hkan sa ai lam hta, tsi htu sa ai shara de masha hpe shayawm nna sa ra na, n-gup magap Mask shakap sa ra na, Ma ni hpe myiman shinggang na matu sum pan la sa ra na hte tinang hpe sha-ang da ai aten ni hta aten dep tsi sa htu hkam la ra na lam, Mungshawa Hkamja Lam Makan Dap Makawp Maga Tsi Yu Reng Du, Ura Naw matut tsun ai kaw na chye lu ai.