Laban bat shagu naw galaw nga ai hkying hkum 12 akyu hpyi lamang hpe bai kahtap jahkring

Mai Ja Yang Buga Hkalup Hpung a laban bat shagu galaw nga ai hkying hkum 12 matut manoi akyu hpyi ai lamang hpe seng ang ai Asuya kawn masha hpawng de na ahkang jaw wa ai aten du hkra jahkring da nna, tinang a dum nta hta laban nawku ai lam galaw sa wa na re hpe na chye lu ai.

Mai Ja Yang Buga Hkalup Hpung hta lai wa sai March shata 21 ya shani kaw nna nawku hpawng hte kaga lamang ni hpe jahkring da sai raitim, laban bat shagu naw galaw nga ai hkying hkum 12 maut manoi akyu hpyi lamang hpe bai kahtap jahkring kau sai lam, Mai Ja Yang Buga Hpung Amu Madu Sara Jangma Htoi Nan tsun ai.

“Laban bat shagu jahpawt hkying 6:00am aten kaw nna shana hkying 6:00pm aten du hkra tinang a aten matut manoi akyu hpyi ai lamang hpe galaw nga ai hta, ya yang grau sadi maja ra ai lam nga ai majaw, June shata 14 ya shani kaw nna nawku jawng kaw akyu hpyi ai lamang hpe jahkring nna, tinang dum nta ni hta akyu hpyi ai lam galaw sa wa na lam hpe bai ndau shabra ai hku re” nga nna tsun ai.

Masha hpwng de ai akyu hpyi hpawng lamang ni jahkring da na lam, Mai Ja Yang Buga hpung kata hta hpaw tawn da ai Ma shalet jawng hte Sasana Boarder hta jawngma hkap la na lam ni hte seng ai lam hpe Mungdan Asuya kaw nna masha hpawng de mai sai lam bai ndau ai shaloi she jawng mying hkap la nna jawng hpaw sa wa na re lam, Sara Jangma Htoi Nan matut tsun ai kaw na chye lu ai.

Mai Ja Yang Buga hpung masha ni gaw, ana hpe hkrit tsang nna nta kaw sha nga taw ai nre sha, tinang a ra ai yi sun hkauna magam bungli ni hpe galaw let, seng ang ai COVID-19 Ana Zinli Makawp Ninghkap Komiti a woi awn ai kata kaw hkan nang hkan sa nna, ana makawp maga bungli ni hpe mung galaw nga ai re lam chye lu ai.