KIA hte Myen hpyen hpung ni gasat poi byin
Mungmyit Sinli Ga (Kachin Sub-state) Namhpaka Ginwang KIA Masat (4) Dap Ba, Masat (8) Dap Dung, Ga Leng Ginwang Daw Nawng Hpan hte Nawng Mau Pa lapran kaw June shata 17 ya jahpawt hkying 7:20 aten hta KIA hpyen hpung ni hte Myen Hpyen Dap, Dapnu (88) ni gasat poi byin ai lam na chye lu ai.
Gasat poi byin ai lam hte seng nna, Salang langai tsun shana wa ai. “Dai mani mana kaw nan awra Sai Hkau hkran de rap wa, Nawng Hkam ntsa de Myen lung wa ai kaw dai anhte kaw na ni Duty la re kaw gale wa na jahkring mi gan gap hkat ai re” nga nna tsun ai.
Gasat poi byin ai gaw KIA hpyen hpung ni nga ai ginra de Myen hpyen hpung ni shamu shamawt wa ai kaw hkrum katut ai majaw, gasat poi byin ai re lam na chye lu ai.
Mungmyit Sinli ginra kata Myen hpyen hpung ni ding yang naw shamu shamawt shang wa ai majaw, ya na zawn gasat poi lang hte lang byin lai wa sai re.
Lai wa sai June shata praw 4 ya shani hta mung, KIA Masat (10) Dap Ba, Masat (17) Dap Dung, Gangming Loi Dau ginra na KIA hpyen hpung ni nga ai ginra de Myen Hpyen Dap Hk.L.Y (79) na hpyen hpung ni shamu shamawt shang wa ai majaw, gasat poi byin lai wa sai sha n-ga, June shata praw 6, 7 ya shani hta mung KIA Masat (6) Dap Ba, Masat (9) Dap Dung ginra, Htan Hpa Bum KIA Hpyen Dap ni nga ai shara de Myen hpyen hpung ni htu shadut lung wa ai majaw, KIA hpyen hpung ni hkap shing la gasat dat ai kawn laja lana gasat poi byin lai wa sai re hpe chye lu ai.
