Namba Mung hte Nam Hu mare lapran kaw KIA hte Myen hpyen hpung ni gasat gala majan byin
Mungmyit Sinli Ga (Kachin Sub-state) KIA Masat (4) Dap Ba, Masat (8) Dap Dung ginra, Namba Mung Ninghtawn, Namba Mung mare hte Nam Hu mare lapran kaw June shata 21 ya shini hkying 10:30am aten hta Myen Hpyen Dap, Dapnu (88) kata na hpyen n-gun 100 jan hte KIA hpyen hpung ni gasat gala majan byin ai lam chye lu ai.
KIA Dap Dung (8) hpyen hpung ni June shata 20 ya jahpawt Lun Hpwi Bum maga de ginra gawan hkawm ai kaw hkying 8:20am aten kawn hkying 8:35am aten laman Myen Hpyen Dap, Dapnu (88) hpyen hpung ni hte gasat poi byin ai re.
Matut nna shani ka-ang hkying 12:05pm aten hta mung, dai Myen hpyen hpung ni hte sha, KIA Masat (29) Dap Nawng Dap Dung ni hte numdaw 2 lang gasat poi byin ai lam chye lu ai.
Myen Hpyen Dap ni hku nna htu shadut ai lam sha naw galaw nga yang gaw, gasat gala majan matut nna naw byin wa na masa nga ai nga nna, shawng lam na Salang langai tsun dan ai kaw na chye lu ai.
Ya aten hta KIA Masat (4) Dap Ba, Masat (8) Dap Dung hte KIA Masat (29) Dap Nawng Dap Dung ginra de, Myen Hpyen Dap, Dapnu (88) kata na hpyen n-gun (600) daram hte hpyen man 5 hku nna, June shata 17 ya shani kawn htu shadut shang wa ai majaw, shani shagu ngu na gasat gala majan byin nga ai re.
