Hpakant kaw n-gam gyi nna masha 2 si, marai 6 hkala

Hpakant Ginwang, Seng Tawng mare, ဘစံေခ်ာက္ hte Sabaw, Bum Nan lung wa ai lam kaw June shata 23 ya shana daw hkying 3:30pm aten daram hta Myanmar Thura hte Tan Shwe Company ni galaw ai nhkun dingsa, Pe 300 daram tsaw ai ga n-gam kaw hka leng gayat nna ga gyi bun ai majaw, Yemase la marai 2 si nna, marai 6 hkala hkrum ai lam chye lu ai.

Ga n-gam gyi bun nna asak si sum ai ni gaw, Seng Tawng lawk (4) kaw na Salang Naw Tawng asak (45) ning hte U Myo Naing asak (37) ning re lam chye lu ai.

Mabyin lawng lam hte seng nna Seng Tawng mare na Salang Zau Seng Awng hpe matut hkai san yu ai hta, “si ai gaw marai 2, hkala ai ni gaw loi law ai ka rai nga, hpa majaw nga yang lung seng htu ai masha nkau mi gaw mahkrum madup nnga nga jang she, Company kaw na ni mung hprisa ni grai gawut ya ai re wa she, shanhte gaw dairam byin na nshadu na n yen ai nhkan e, shanhte lung seng htu nga ai ga n-gam kaw hka leng gayat nna hkala ai law mat wa ai re” nga nna tsun dan ai.

Hkala hkrum ai masha ni hpe Shinggyim Nauna Wuhpung Wuhpawng ni kaw nna wa garum la nhtawm, ya aten dai machyi masha ni gaw Hpakant Mungshawa Tsi Rung kaba kaw tsi tsi hkamla nga ai rai nna, hkala hkrum ai masha ni law malawng gaw, Seng Tawng mare masha ni re hpe mung chye lu ai.

Tinang a kan bau magam bungli, galaw lu galaw sha ai lam hta byin wa ai re majaw, Company kawn lit la ya ai lam gaw nnga ai raitim, garum ningtum jaw ai lam hta mai byin ai daram shang lawm ai re lam, Salang wa matut tsun dan ai.

Ya aten lanam ta laman lung seng htu sha ai masha ni law malawng ga shingbut gyi nna masha si, hkala ai lam law ai re majaw, seng ang ai Asuya lahkawng hte mare Salang ni atsawm jahkrup nhtawm, ndai Hpakant ginra lung seng htu sha ai lam hta Salang ni atsawm hkan gawan yu nna, tsun shadum hpaji jaw ai lam ni galaw ai rai yang, ya na zawn re mabyin manghkang ni hpe shayawm kau lu na re lam, Salang wa matut tsun ai kaw na chye lu ai.

Seng Tawng ginra hta ginhtawng ta kaw nna ya aten du hkra rai yang ga shingbut gyi nna masha si, hkala ai lam gaw tsalam shadang 10 jan daram byin sai re hpe chye lu ai.

Photo Crd; Fb