Hpung shang masha langai mi a atsam ningja ngu ai ga baw hte ga shagawp ka shingjawng ai lam galaw nga
Mungchying Magam Dap Party Komiti kaw nna Wunpawng Mungdan Shanglawt Hpung Party shang masha ni hpe hpung shang masha langai mi a atsam ningja ngu ai ga baw hte ga shagawp ka shingjawng ai lam woi awn galaw nga ai re hpe chye lu ai.
Shingjawng lamang hpe June shata hta ginchyum dat na matu masat da ai raitim, COVID-19 ana zinli a majaw, nhtoi htawt sit nna ginchyum dat na matu myit hkrum dawdan da lu sai majaw, September shata 20 ya shani du hkra ga baw kahkyin sa wa na hte ga shagawp shingjawng lamang hta myit lawm ai hpung shang masha ni kadai raitim, shang lawm shingjawng mai ai re hpe chye lu ai.
Ga shagawp shingjawng lamang galaw ai yaw shada lam hpe Mungchying Magam Dap Party Komiti Amu Madu Salang Kaba Maran Awng Gun ya na zawn tsun ai.
“Shingjawng lamang galaw ai ngu hta Party shamu shamawt lam rai nga, ya yang na anhte Wunpawng Mungdan Shanglawt Hpung shang masha ni, hpung shang masha majing mi rai rai, shingnan hpung shang masha mi rai rai, hpung komiti a lai sat lai sa mahkrum madup hte hpung shang masha langai mi a rawng ra ai atsam ningja ni hpe jahpring shatsup lu u ga matu yaw shada ai re” nga nna tsun ai.
Party shamu shamawt shabyin shatai komiti kaw nna hpung shang masha langai mi a atsam ningja ngu ga baw hpe shaw let woi awn galaw ai re hpe chye lu ai.
Ga shagawp shingjawng laika mahtai hpe Party shamu shamawt shabyin shatai komiti kaw nna jep ai hta, ahkyak ai lami laman lawm nna ka ai ga shagawp ni hpe lata la nna, tinang nan ka ai ga shagawp hpe October shata 25 ya, KIO masat nhtoi shawa hpwng hta ndau hti dan shangun ai lam galaw na hte masat jaw lata la nna nambat lu ai ni hpe kumhpa shagrau na matu sawn da ai lam nga ai re lam, Salang Kaba matut tsun ai kaw na chye lu ai.
Ndai ga shagawp shingjawng ai lam gaw daining shawng nnan lang woi awn galaw ai lam rai nna, Party shamu shamawt masing kata shingjawng lamang ni hpe ladat shaw nna matut galaw sa wa na masing nga ai re hpe mung chye lu ai.
