KIO uphkang ginra kata Quarantine hkam la nga ai masha jahpan
KIO uphkang ginra kata na hkamja lam jep chyoi dabang ni hta June shata 26 ya shani hkamja lam masam maram hkam la nga ai masha marai (269) nga ai lam chye lu ai.
Mai Sak pa hkamja lam jep chyoi dabang kaw marai (25), Mung Lai Hkyet hkamja lam jep chyoi dabang kaw marai (75), Pajau Sha-it Yang hkamja lam jep chyoi dabang kaw marai (4), Hpalap Naru Hkamja Lam Jep chyoi dabang kaw marai (19), Sinpraw Ginwang Ginjaw Mai Ja Yang Hkamja lam jep chyoi dabang kaw marai (72), Manmaw Ginwang, Lana Zupja hkamja lam jep chyoi dabang kaw marai (74) yawng marai (269) nga ai re hpe Hkamja Lam Jep Chyoi Dabang lit nga ai Salang ni kaw na chye lu ai.
KIO uphkang ginra kata hkamja lam jep chyoi dabang 8 hpaw da ai hta Dum Bung Hkamja lam jep joi dabang hte Alen Bum Hkamja lam jep chyoi dabang hpe dawm ai lam nga sai re.
KIO uphkang ginra kata na hkamja lam jep chyoi dabang ni hta ya aten du hkra hkamja lam masam maram hkamla ngut ai masha marai (1015) nga ai rai nna, COVID-19 ntsen nhten masha marai (110) tsi jep hkamla ai lam nga ai hte ya aten du hkra ana kap hkrum ai machyi masha garai nnga ai lam, Ginjaw COVID-19 Ana Zinli Makawp Ninghkap kaw na chye lu ai.
KIO uphkang ginra COVID-19 ana zinli hpe makawp ninghkap na matu masat jahkrat da ai tara ni hpe matut hkan sa shatup na matu June shata (30) ya shani du hkra nhtoi masat da ai lam nga ai re hpe mung chye lu ai.
