Langai lang na Lachid amyusha ni a hkrum zup bawngban hpawng galaw la lu
Lachid Htunghking hte Laili Laika Hpung kaw nna woi awn nhtawm, Mungkan hta chyam bra nga ai, Lachid htunghking hte laili laika, ga, nchye mat sai Lachid amyu sha ni hpe zinlum ai hku nna, langai lang na Lachid amyusha ni a hkrum zup bawngban hpawng hpe online hku galaw la lu sai lam chye lu ai.
Lachid amyu lakung ni gaw Kachin bawsang amyu lakung 6 nga ai kaw na amyu lakung langai re majaw, Lachid Htunghking hte Laili Laika Hpung kaw nna Mungkan hta chyam bra nga ai Lachid laika, Lachid ga, nchye ai Lachid amyu sha ni hpe online hku nna laika sharin sa wa na matu myit hkrum bawngban la lu sai lam chye lu ai.
Hkrum zup hpawng hpe online hku June shata 27 ya shani galaw ai rai nna, hpawng hta Lachid amyu sha lam yan hte sut masa ngu ai ga baw hte Du Wa Mangshang Ding Ying, Lachid amyusha laili laika hte htunghking ngu ai ga baw hte Duwa Labau Zung Bawm, chyeju hpring ai amyu tai ra ai ngu ai ga baw hte Rev. Lung Bang Teint Saung, reng ai amyu ni a myit marai ngu ai ga baw hte Rev. Dr. Lagwi Bawm Luk, mung masa lam hte seng nna gaw Duwa Zahkung Ying Sau kaw nna tsun sanglang dan ai lam galaw ai re hpe chye lu ai.
Mungkan hta chyam bra taw nga ai Lachid ga nchye ai, tinang amyu htunghking hpe nchye mat sai lachid amyu sha ni hpe zinlum ai lam rai nna, Kachin bawsang 6 nga ai kaw na Lachid amyu ni gaw amyu lakung langai re hte amyu lakung shagu yawng zet tsang ai rai yang, Mungkan hta Kachin ngu ai hpe dandawng wa lu na re majaw, amyu lakung shagu nmai shayawm ai, yawng jawm shakut shaja ra ai ngu yaw shada let, ndai hkrum zup bawngban hpawng hpe galaw ai re lam, Waimaw Lachid Htunghking hte Laili Laika Hpung Ningbaw Saranum Bawm Sang tsun ai.
Lachid Htunghking hte Laili Laika Hpung kaw nna Mungmyit Sinli Ga hte kaga ginra shara shagu de Lachid laika hte Lachid ga hpe madung dat sharin sa wa na re lam, ndai hkrumzup hpawng gaw shawng ningnan lang galaw ai lam rai nna, matut nna shaning shagu galaw sa wa masing nga ai re hpe mung chye lu ai.
Photo Crd; Lacid’s Circle
