IDPs Camp hte buga hpung htinggaw shagu hpe malu masha bai garum jaw na matu hkyen shajin nga
Myitkyina, Jan Mai Buga Hkalup Hpung kaw nna Jan Mai buga nawku hpung kata shanu nga ai IDPs Camp hte buga hpung htinggaw shagu hpe July shata praw 4 ya shani malu masha bai garum jaw na matu hkyen shajin nga ai lam chye lu ai.
Hpung htinggaw 952 hpe htinggaw mi hta, n-gu bye 12, sau hte jum ni hpe garum jaw na matu hkyen shajin nga ai lam, COVID-19 aten ladaw, yak hkak hkrum nga ai hpung masha ni hpe malu masha garum jaw ai lam hte seng nna Jan Mai Buga Hkalup Hpung Amu Madu Hpungtau Hkangda Gun Tawng Li tsun dan ai.
“Ana zinli kaba byin ai aten hta hkawm sa hkawm wa yak, tam lu tam sha yak ai ahkying aten re majaw, laiwa sai ten ni hta gaw buga hpung a rawt jat lam hta hpung masha ni grai shang lawm shakut shaja sai, daining gaw buga hpung masha ni yak hkak ai aten hta buga hpung kaw nna hpung masha ni hpe daw chyen sha pi madi shadaw lu ai lam rai u ga matu, ana zinli hkoi san wa u ga chyeju wunli lu sha langai hku nna bai garan jaw ai lam re” nnga nna tsun ai.
Malu masha ni hpe buga hpung kata na Sara ni, lawk lithkam, hpungtau ni hte hpung rung magam gun ni kaw nna hpung lawk shagu dum nta kaw di sa du garan jaw na re lam chye lu ai.
Jan Mai Buga Hkalup Hpung kaw nna laiwa sai April shata 30 ya shani hta mung buga hpung kata nga ai IDPs Camp hte nawku hpung htinggaw 947 hpe n-gu, shakau, gala shapre, sau, jum hte Mask ni hpe garum jaw ai re, matut nna mung masa hta hkan nna aten grai galu wa ai rai yang, yak hkak ai hta hkan nna garum jaw sa wa na re lam chye lu ai.
