Shaw da lu sai moimang ni hpe makoi mayang nga sai hte kaput ngam nga ai moimang ni hpe naw matut tam nga

Hpakant, Gwi Hka Maw ga gyi ai hta July shata praw 4 ya shani du hkra moimang 174 du sai hte shaw da lu ai moimang ni hpe Gwi Hka lup ding lup wa kaw makoi mayang nga sai lam chye lu ai.

Madu nga sai moimang ni hpe makoi mayang ai lam ding yang galaw ai rai nna, madu nmu shi ai moimang ni hpe gaw Hka Gye Sadek kaw bang nhtawm, naw tawn da ai lam, asak si sum ai masha marai 174 kaw na Wunpawng amyusha marai 15 lawm ai lam chye lu ai.

Ya aten Hpakant Mungshawa Tsi Rung kaw tsi tsi gawn lajang hkam la nga ai masha jahpan yawng marai 54 re hte tsi tsi hkam la nna mai tsai wa ai ni gaw dum nta de wa ai mung nga sai rai nna, naw kaput ngam nga ai moimang ni hpe lamu marang masa hta hkan nna matut manoi naw tam nga ding yang re lam chye lu ai.

Asak si sum ai ni hte hkala hkrum ai masha ni hpe garum ningtum jaw na matu Myen Mung a Gumsan Magam kaw nna komiti langai hpaw da ai lam nga sai rai nna, masha asak si sum ai jahpan tup hkrak lu la ai hpang garum ningtum jaw ai lam hpe galaw sa wa na matu hkyen shajin nga ai re hpe mung na chye lu ai.

Ndai ga gyi nna asak si sum ai lam gaw shawoi byin ai hta grau sawng ai re majaw, Myen Mung Gumsan Magam kawn lamu ga hpe jep chyoi na hte seng nna komiti hpaw da sai re majaw, lanam ta hta lung seng htu sha ai lam hpe mung gara hku galaw sa wa na ngu ai hpe garai nchye lu shi ai lam, Salang Dashi Naw Lawn tsun dan ai kaw na chye lu ai.