Gai Daw mare kaw masha marai (5) kahtam sat hkrum
KIO uphkang ginra rai nga ai Manmaw Ginwang, Nba Pa Ginwang Daw kata, Gai Daw mare lawk (3) kaw July shata praw 2 ya shana Salang Ya Ku Lang Zing Tang Gun hte rau nta masha marai (5) kahtam sat hkrum ai lam na chye lu ai.
Sat hkrum ai ni gaw Salang Ya Ku Lang Zing Tang Gun (Kawa), Jan. Maureen Sumlut Htu Nan (Kanu), Shadang Lang Zing San Li Naw, Shadang Lang Zing Doi San Awng ni hte Kawoi Dwi Ja Nyem Htu ni rai nna, kasha Ma Gam sha hprawng lawt ai raitim, kajawng nna ga nlu shaga mat ai lam ni byin ai re hpe chye lu ai.
Sat hkrum ai mabyin lawng lam hte seng nna Gai Daw buga hkalup hpung magam gun Sara Lasham Hpung Jar tsun dan ai.
“Ya na byin ai mabyin hpe anhte maram yu daram nga yang, shanhte kaw mung grai rai na mangkang kaba nga ai hpe anhte mare kata kaw na gaw n mu mada ai. Masha si mang hpe yu ai shaloi madu wa hpe shat gawk kaw, madu jan hpe gaw nhku chying hka lam hpaw dat ai hte mu ai, kawoi dwi hte kasha marai lahkawng hpe gaw yup ku ntsa kaw dai hku rai nna dinggran sat mat wa ai zawn zawn re lam ni byin ai. Kadai gara hku kaning rai na sat ai ngu ai shiga gaw ya du hkra nchye lu shi ai re” nga nna tsun ai.
Ndai manghkang hte seng nna KIO magam gun ni kawn n tsen nhten ai masha marai (2) hpe July shata praw (2) ya shani hkying 12:00pm aten daram hta rim la nna, ya aten Manmaw Ginwang Uphkang Rung kaw masha sat amu hpaw nna jep chyoi nga sai lam na chye lu ai.
Gai Daw mare hta ya na zawn masha sat ai manghkang lai wa sai shaning ni hta mung, byin ai lam ni nga ai raitim kadai galaw ai re hpe jep sagawn lu ai lam ya du hkra nnga ai re majaw, mare masha ni mung grau nna hkrit tsang nga ai lam, mare shim lam a matu balik dap zawn re lu lajang ya ai raiyang. shimlum lam kachyi mi sha pi lu na re ngu myit mada ai lam, sara matut tsun dan ai kaw na chye lu ai.
Ndai amu manghkang a teng man ai mabyin hte gara hku matut jep sagawn ai lam, tara rung a daw dan je yang ai lam ni hpe matut sawk sagawn tang madun na re hpe mung chye lu ai.
Photo Crd; RVA
