COVID-19 ana zinli makawp maga lam hte seng nna hpaji jaw laika pa garan

Myitkyina, Maw Hpawng Buga Hkalup Hpung kaw nna woi awn ai hte, Maw Hpawng Buga Ramma ni kaw nna COVID-19 ana makawp maga lam hte seng ai hpaji jaw laika pa garan ai lam hpe July shata praw 7 ya jahpawt galaw  ai lam chye lu ai.

COVID-19 ana zinli hpe ahpa atang nmyit ai sha, ana zinli hpe matut nna makawp maga sadi maja sa ra na lam hte hpaji jaw laika pa garan ai yaw shada lam hpe Maw Hpawng Buga Hkalup Hpung Ramma Media Lithkam Sara Lahpai Zau Seng Naw tsun ai.

“COVID-19 ana byin ai mung shata 6 daram rai wa sai, kaga mungdan hkan gaw tara jahkrat da ai lam ni hpe shayawm kau ai zawn re nga wa sai raitim, ana gaw kalang bai byin wa re hpe nkau ni gaw nau na wa jang she myit tsang ai lam ni yawm wa nna shawoi na zawn sha bai byin wa ai raitim, ana gaw hkoi tsai mat ai lam nrai shi ai re majaw, hpaji jaw laika pa garan ai lam hte kalang bai shadum ai lam re” nga nna tsun ai.

Hpaji jaw laika hta COVID-19 ana zinli makawp maga lam hte Num, Ma mazut roi rip ai lam hpe gara hku makawp maga sadi sahka ra ai lam ni hpe hpaji jaw ningmu jahpaw da ai lam ni lawm ai re hpe chye lu ai.

Laika garan ai lam hpe shawoi galaw ai lam nga ai raitim, ndai lang gaw gat dut, gat sa mari ai masha ni yawng hpe lu garan jaw ai re lam, matut nna Maw Hpawng buga ramma ni kaw nna buga hpung hte kaga wuhpung wuhpawng ni kaw nna garum hpyi wa ai lam shagu hta, dang di dang dep ai daram shang lawm sa wa na re lam Sara Lahpai Zau Seng Naw matut tsun dan ai kaw na chye lu ai.

Maw Hpawng Buga Hpung kata, hpung htinggaw 200 jan shanu nga ai rai nna, Maw Hpawng Buga hpung hte UN kaw na Salang ni mahkri shawn nhtawm, ya aten ana zinli a majaw Maigan Mungdan kaw bungli nlu galaw nna jam jau hkrum nga ai Wupawng amyusha ni hpe myit n kaji na matu, asuya kaw nna mung n kabai da na matu garum madi shadaw sa wa na lam hte seng nna ningmu jahpaw na lam ni nga ai re hpe mung matut chye lu ai.

Photo Credit; Maw Hpawng Ramma Komiti