Myusha Gintawng Karate shingjawng lamang galaw

Laiza Muklum, Sinpraw Majoi Manau wang hta February praw, 8 ya shani kaw nna February, 11 ya shani du hkra, Myusha Gintawng Karate Komiti kawn woi awn nhtawm shawng ningnan lang ngu na Karate shingjawng lamang hpe galaw nga ai lam chye lu ai.

“Shingjawng lamang galaw ai lam gaw Ma ni hpe mahkrum madup jaw ai mung rai, kalang shingjawng ai kaw shanglawm jang mahkrum madup grai nga mat ai, myit masin ngangkang 

ai kaw na hkawt, tinang hpa baw ra mat ai hpa baw naw galaw ra ai gade daram ningtawn wa sai ngu ai lam ni hpe chye la na matu hte matut manoi galaw sa wa ai kaw akyu rawng u ga, myit marai, myit n-gun awai lu ai baw rai u ga ngu yaw shada let galaw ai re” nga Myusha Gintawng Karate lamang hta woi awn nga ai sara Pungka Hkun Naw tsun ai.

Ndai Karate shingjawng ai lam hta kaba pang, kaji pang, Num/La garan nna ginsup ai lam galaw ai, ya aten hta ginsup ai masha yawng marai ( 400 ) daram rai nga sai lam, ginsup mayu ai ni hpe asak 6 ning kaw nna hkap la ai lam sara Hkun Naw matut tsun ai.

Myusha Gintawng Karate sharin ai lam hpe laiwa sai 2012 ning hta hpaw hpang dat ai rai nna, ya aten hta ginsup ai shara ni hpe Laiza Pa, Je Yang hpyen yen dabang, Hpyen Du shalat jawng, Myitkyina Npawn Lup Buga Hpung, Manghkring, Nawngnang Chyum Jawng ni hta hpaw da sai lam hpe chye lu ai.