Masat yan (6) Media Training yu hpawng galaw

Wunpawng Mungdan Shanglawt Asuya Shiga Magam Dap kaw nna hpaw sharin ai Masat yan (6) Media Training yu hpawng hpe NID zuphpawng gawknu kaw July shata praw 9 ya shani hkying 10:00am aten hta galaw la lu sai re.

Hpawng hta jawng yu ai jawngma marai 14 hpe jawng yu masat laika shagrau ai lam, laksan lamang hku nna shiga magam dap kata bungli shakut shaja ai lam hta dawn jan ai magam gun ni hpe mung masat kumhpa shagrau ai lam galaw ai re.

Hpawng hta dai ni jawng yu ai jawngma ni hpe Shiga Magam Dap Lithkam Du Kaba Nhpang Naw Bu kaw nna n-gun jaw shatsam mungga tsun ai hta, “Ya sharin ya ai gaw hkum tsup ai lam nre, ningpawt ninghpang sharin ya ai lam sha re ai, matut nna sharin hkaja la na matu lam hpaw ya ai, ahkaw ahkang hpaw ya ai lam she re, mying gumhkawng ai Media ninghkring byin na matu tinang atsam dat shakut ai, myit lawm hkum lawm shakut ai, hkam sharang lu ai hta madung re majaw, nnan bungli shang ai ten kaw nna myit maju jung let, hkaja let galaw, galaw let hkaja rai ga ngu n gun jaw shatsam dat ai rai sai” nga nna tsun ai.

Shiga sawk ka ai, shiga shapoi ai bungli gaw pyaw ai, arawng power hte hkawm ai hkrun lam nre, yakhkak ai lam dut dang ai lam, masha ni tsun jahpoi ai lam law law hpe hkam sharang let galaw hkawm sa ra ai magam hkrun lam re hpe dum shangun mayu ai re nga nna mungga hta matut tsun da ai.

Wunkat lu lung ai majaw kabu ai lam, dum nta kaw kade yak hkak ai lam nga ai raitim, tinang amyu laili laika htunghking, myu hte mungdan a matu shakut shaja sa wa sa na re majaw, myit n-gun lu ai lam, dai ni jawng yu ai Shayi Goretti Sumlut kaw nna shi a hkamla lam hpe tsun dan ai.

Wunkat hta Media hte seng ai sharin ginhpan ni hpe Shiga Magam Dap Hpa-awn ni hte tatut bungli galaw nga ai magam gun ni kaw nna madung lit la sharin ya ai rai nna, Jinghpaw Laika Ka Htung Ka Lai hpe Ginjaw Hpaji Dap kaw na Sara Kaba Lashi Naw Ja kaw nna sharin ya ai re the Ninggawn Mung Masa, Rawt Malan Labau, Magam Dap hkri dun lam hpe Shiga Magam Dap Lithkam kaw nna woi hkaja ai re hpe chye lu ai.

Masat yan (6) Media Training hpe March shata 23 ya shani hpaw sharin hpang ai rai nna, Media Training Masat yan (1) kaw nna Masat yan (6) du hkra rai yang, jawng yu ai jawngma yawng marai 125 du sai lam, hpawng lamang hta Magam Dap, Makan Dap kaw na saw shaga da ai Magam gun ni, Shiga Magam Dap magam gun ni, nawku hpung woi sara ni hte jawngma kanu kawa ni sa du shang lawm ai re lam chye lu ai.