Putao Ginwang kata Asuya jawng ni hta Jinghpaw laika sharin sa wa na lam zup hpawng galaw
Putao Ginwang hta nga ai Asuya jawng ni hta Jinghpaw laika hpe Ginhpan (subject) langai mi hku na sharin sa wa lu na matu July shata 15 ya shani hta, JHG Rung kaw Htunghking Salang Ningbaw ni sa du bawng ban jahkrup la lu sai lam chye lu ai.
Hkrum zup bawng ban hpawng hta Putao Ginwang Htunghking Ningbaw Malai Duwa Maran Awng Hkam , Sumpra Bum Ginwang na Htunghking Salang hte Jinghpaw Wunpawng Htunghking hte Laili Laika Hpung ( JHG ) kaw na Htunghking Salang ni sa du bawng ban jahkrup la lu sai re.
Jinghpaw mung kata ting hta Ginwang 18 nga ai rai nna, Ginwang 17 hta gaw Jinghpaw laika hpe ginhpan langai mi hku na tsang 2 du hkra sharin nga sai re.
Putao Ginwang hta mung Jinghpaw laika hpe Ginhpan langai mi hku nna Myen asuya jawng 8 daram hta lu sharin mat wa hkra ya na zawn bawng ban ai lam galaw ai re hpe chye lu ai.
“ Putao Ginwang hta gaw anhte hpunau Lisu hte Rawang ni law yang she Jinghpaw ga nchye ai ni loi law wa ai. Rai yang gaw anhte Wunpawng Myusha ni kata shada makyit mahkai ai lam, tsun shaga ai lam hta mung yak hkak wa ai zawn re lam ni nga ai. Dai re majaw dai ning kaw nna gaw ndai lam ni hpe grai n gun dat wa saga ngu yaw shada let bawng ban ai lam re” nga nna Jinghpaw Wunpawng Htunghking hte Laili Laika Hpung ( JHG ) Ningbaw Htingnan Yaw Sam tsun ai.
Jawng hpaw wa ai ten hta Jinghpaw laika sharin na Sara/num ni hpe JHG Ginjaw de shaga la nhtawm jawngma ni hpe Jinghpaw laika hpe gara hku/ gara ladat hte sharin ra na ngu ai ( Teaching Method ) ni hpe mung JHG kaw nna sharin ya na re hpe chye lu ai.
Asuya jawng ni hta Jinghpaw laika hpe sharin sa wa ai shaloi gara ladat hte sharin sa wa na ngu ai ladat hpe JHG Ningbaw Htingnan Yaw Sam gaw ya na zawn tsun dan ai.
“ Jinghpaw laika sharin ai aten hpe laksan aten langai masat nna sharin sa wa na re. Jinghpaw laika sharin ai Sara/ num ni a matu shata shabrai hpe Asuya kaw nna jaw ya na matu galaw sa wa na re.
Myen mung Asuya ( ျမန္မာနိုင္ငံ ဗဟိုအစိုးရ ) kaw nna mung တိုင္းရင္းသားေတြရဲ့ စာေပျမင့္တင္ေရး၊ တိုင္းရင္းသား အခန္းက႑ ျမင့္တင္ေရး ngu ai Polisy jahkrat da ai hte maren lawu tsang kaw nna lahta tsang du hkra Jinghpaw laika sharin na ahkang jaw da ai re.
jinghpaw laika gaw Jinghpaw mung kata hta wunpawng myusha ni yawng jai lang ai ga madung re. Wunpawng Mungdan Shanglawt Asuya hte nawku makam masham hpung yawng hkra mung ndai hpe jai lang ai re.
Anhte wunpawng myusha ni yawng ndai laika kanu laika kaba hpe jawm lang nna Amyu kaba tai wa lu na matu yaw shada let Myen Asuya jawng ni hta jinghpaw laika hpe sharin hpang wa ai re lam Htunghking salang langai tsun ai kaw nna chye lu ai.
