Ninggawn Mungmasa Lam-yan sharin achyin wunkat galaw

Ginjaw Komiti kata na pati shamu shamawt woi awn komiti kaw nna woi awn ai hte Ninggawn Mungmasa Lam-yan sharin achyin wunkat hpe Laiza Lahta Tsang Jawng, Rawt Ninghkawng Gawknu kaw July shata 20 ya shani kaw nna July 30 ya shani du hkra galaw na lam chye lu ai.

Ninggawn Mungmasa hpe Wunpawng Mungdan Shanglawt Asuya laika sharin jawng ni hta sharin sa wa lu na matu madung yaw shada ai re hte Hpaji lam hpe madi shadaw shangang shakang ya ai lam rai nna, jawngma shayi shadang sha ni tinang Asuya, tinang Mungdan a lam grau nna chye na hkawn hkrang wa na matu, ninggawn mung masa lam yan hpe chye na hkawn hkrang wa lu na matu, myu tsaw mung tsaw myit rawt jat wa lu na matu, tinang mungdan shanglawt lu wa hkra tinang hta ang ai lit hpe kang ka sadi sahka hte shang lawm gun hpai sa wa na matu hte mungkan a mungsang mung masa hpe dep hkap ai made chye na hkawn hkrang wa lu na matu yaw shada let galaw ai re lam chye lu ai.

Ningbaw ningla magam gun tai wa na ramma ni gaw ninggawn mung masa hpe sharin nan sharin achyin hkam la ra ai lam, Ningawn Mungmasa sharin achyin shabyin shatai komiti Ningbaw Sara Kaba Marip Naw Htoi ya na zawn tsun dan ai.

“Ninggawn Mung masa sharin achyin ai lam gaw ra nan ra ahkak ai lam re, ramma shayi shadang sha ni gaw mung masa lam yan hpe pi nna ga ai ni lawm ai re, ninggawn mung masa hkam la ai lam gaja jang she hpawt ni hpawt din ningbaw ningla magam gun tai wa na ramma ni gaw ninggawn mung masa a akri hpe chye nna magam bungli galaw sa wa ai lam hta mung hpadi hpadaw tai na matu yaw shatawng shada ai re” nga nna tsun ai.

Sharin sara hku nna Ningtau Ninggawn Amu Madu Salang Kaba Labang Doi Pyi Sa kaw nna madung lit la sharin ya ai rai nna, Ninggawn Mungmasa lam yan hpe sharin achyin hkam la ngut sai sharin Sara/num ni gaw tatut jawng ni hta ninggawn mung masa hpe tsang 7 kaw nna sharin ya na re hte lawu tsang daw na jawngma ni hpe gaw Makawn hte Ga shagawp ni sharin ya na re lam chye lu ai.

Wunkat hta Ginjaw Ginra Ginwang Ginjaw, Sinpraw Ginwang Ginjaw hte Dingda Ginwang Ginjaw kaw na sharin sara/num ni yawng marai 39 sa du sharin hkam la nga ai lam chye lu ai.