Jahtu Zup mare hka kaba wa ai majaw mare masha ni shara htawt sit hkrum

Hpakant Ginwang Jahtu Zup mare hta mare masha 1500 daram gaw hka hpyen a majaw shara htawt sit shanu nga ai lam buga masha ni shana wa ai kaw nna chye lu ai.

Ya na zawn yinam ladaw aten hta, marang kaba htu nna Mogaung hka kaba wa ai hte  mare kata htu shadut shang wa ai rai nna mare masha ni tinang dum nta kata nmai nga, nmai shanu wa ai majaw htawt sit ai re hpe chye lu ai.

Ndai shara htawt sit ai lam hpe gara wuhpung kawn madung lit la nna woi awn galaw ai lam nre sha kadai mung tinang a ni nawn ai jinghku jingyu dum nta, KBC nawku hpung ginra hte Myen Budha ni a Hpung gyi jawng shara ni hta htawt sit shanu nga ai re.

“Shat lu sha hpe chyawm gaw htawt sit da ai dum nta, nawku hpung, mare hkan na kanu kawa ni, garum ningtum hpung ni hte kaga hpankant kaw na garum ningtum hpung ni mung sa du rai nna jawm garum jaw let rau jawm shadu, garan sha nga ga ai re. Ya hkyak hkyak grau yak hkak ra kadawn nga ai gaw lu hka rai nga ga ai, ndai gaw grai jam jau nga ga ai” nga nna Jahtu Zup mare na Salang Htoi Awng tsun ai.

Jahtu Zup mare hta July shata 19 ya shana kaw nna hka shang hpang wa ai re. Hka grai kaba sawng wa nna masha nga nmai wa ai majaw, shara htawt sit hpang wa ai gaw 20 ya shani kaw nna rai nhtawm daini July shata 22 ya shani du hkra rai yang 3 ya tup rai sai hte ndai hka sha nyawm dingsa, nhkyet dingsa gaw ndai shara ni kaw sha naw shanu nga ra na re lam buga masha ni tsun dan ai.

Hka kaba ai hta nlu la ai rai grai law ai re. Nkau mi dumsu, U, Wa, Nga, Gat seng ni yawng lim mat ai, jak, cycle lu ai ni jak,cycle yawng mat ai, hpun nba ni yawng hka kata lim mat ai hte  Sun, Hkauna ni yawng mung lim mat ai re. Hka gaw kajawng kaja rai, shana yup tung masha yup ai ten shang wa ai majaw kaga arung arai hpa mung nlu la ai re. Nkau mi gaw nta htinggaw nawng yawng lawm mat ai mung lawm ai re lam buga masha ni kaw nna chye lu ai.

“Yak hkak ai lam gaw grai law saga ai law daining gaw. Lai wa sai shaning December shata htum ai shana hta mung anhte Jahtu Zup mare hta Gat Pa kaba hkru lai wa sai re. Dai hpang CONID-19 bai du wa jang gaw kadai mung nmai le mat ai. Kadai mung grai yak taw ai kaw, ya daini hka hpyen bai du wa jang gaw grau yak ai ga rai nga sai. Grau nna gaw hpyen yen mung nga re majaw ram ram yak hkak taw ai kaw du taw nga saga ai” nga nna Salang Htoi Awng tsun ai.

Jahtu Zup mare hta gaw Mogaung hka, Jahtu hka hte hkaw-ngaw hka nga nna hka kaba masum zup ai shara re. Ya na zawn yinam ladaw aten hta marang htu ai hte shaning shagu kaba taw ai rai nhtawm daining gaw hka kaba dik ai sawng dik ai shaning mung re.

Ya aten hta Jahtu Zup mare gaw buga kata garum ningtum hpung ni hte garan kachyan jawm lu jawm sha rai nna grai yak hkak nga ai re.

Jahtu Zup mare ting hta rai yang mungshawa yawng hting gaw 1000 daram nga ai hta hka hpyen a majaw shara htawt sit shanu nga ai mungshawa yawng gaw htam masum hta na hkam mi daram nga ai re lam chye lu ai.