Jinghpaw labau sumla madun maumwi laika buk ap ya

Jinghpaw Mungdaw kata Myen asuya jawng ni hta Jinghpaw laika sharin ai kaw jai lang lu na matu Jinghpaw hku ka da ai  labau sumla madun maumwi laika buk 4800 hpe Jinghpaw Mungdaw Asuya kaw nna Jinghpaw Wunpawng Htunghking hte Laili Laika Hpung Ginjaw (JHG) hpe ap ya sai lam chye lu ai.

“Ndai Jinghpaw labau sumla madun maumwi laika buk hpe JHG kaw nna shapraw ai re, hkrat ang ja gumhpraw hpe Unicef ni malawng shaw ai, anhte JHG ni kau chyen shaw ai, maumwi buk ni hpe gaw asuya kaw nna lit la dip shapraw ya nna, laika buk 4800 hpe ap ya ai re” nga nna JHG Ningbaw Duwa Htingnan Yaw Sam tsun ai.

Lu la sai Jinghpaw labau sumla madun maumwi laika buk ni hpe Jinghpaw Mung kata Giwang shagu Jinghpaw laika sharin ai asuya jawng ni de garan ya na re lam chye lu ai.

Ndai maumwi laika buk hpe asuya jawng tsang 1, tsang 2 ni hpe garan nna sharin sa wa na masing re hte ya na zawn Jinghpaw labau sumla madun maumwi laika buk dip shapraw nna asuya jawng ni hta sharin sa wa ai lam gaw lai wa sai 2018-2019 ning hpaji ladaw kaw nna sharin hpang sai lam chye lu ai.

Jinghpaw Mungdaw kata Myen asuya jawng ni hta Jinghpaw laika sharin ai tsang 1, tsang 2 jawngma 30000 jan nga ai re, Ginwang shagu laika 4800 garan jaw na matu nlaw shi ai re majaw, laika buk ni hpe asuya de laika bai tang nna ladat shaw dip shapraw sa wa na matu hkyen lajang nga ai lam chye lu ai.

Jinghpaw laika sharin jawng ni, laika tsang ni hpe bai sharin jat sa wa na masing nga ai rai nna, Jinghpaw laika sharin sara/num ni 100 jan hpe mung bai jat sa wa na re hte Jinghpaw laika hpe galu kaba wa hkra mungchying mung shawa yawng jawm madi shadaw ra na lam, JHG Ningbaw Duwa Htingnan Yaw Sam matut tsun ai kaw na chye lu ai.

Photo Credit; JHG News Kachin State