Kachin Development Group ( KDG ) kaw nna hkamja lam hte seng ai wunkat jaw
Laiza Muklum Shinli Hotel gawknu kaw July shata 27 ya shani kaw nna 31 ya shani du hkra nhtoi 5 ya tup Hkamja lam hte seng ai ningmu jahpaw hkaw tsun hpawng hpe Kachin Development Group ( KDG ) kaw nna woi awn galaw ai re lam chye lu ai.
Wunkat galaw ai lam a yaw shada lam gaw “ Hpyen yen mungshawa ni a dinghkrai san seng san pan lam, makau grup yin san seng san pan lam hpe rawt jat wa lu na matu, kan hten kan mase ana kaw nna makawp maga lu na matu hte ndai zawn re lam a majaw asak si sum ai lam yawm wa lu na matu ngu yaw shada let ndai magam bungli hpe galaw hpang wa ai re” nga nna KDG wash manager Bawk Naw tsun ai.
Wunkat hta KDG kaw na magam gun ni nan woi awn sharin ya ai rai nhtawm hpyen yen dabang ni kaw nna tatut magam bungli galaw na rai nga ai sharin sara ni hpe sharin ya ai lam re.
Sharin ai lam hte seng nna gaw san seng san pan lam madung sharin na re. Asak 5 ning kaw nna 12 ning lapran na jawng ma ni hpe dinghkrai san seng san pan lam hte seng na sharin ya ai, hpyen yen dabang hta nga ai mungshawa ni kaw na asak 13 ning hte 50 ning lapran na shayi numsha ni numhkying sa ai ten hta ladat jaw ai hte gara hku gawn lajang la ra ai ngu ai lam ni hpe madung sharin mat na re, nga nna sara Bawk Naw matut tsun dan ai.
Ndai wunkat hta KIO uphkang ginra rai nga ai Mai Ja Yang, Maga Yang, Sha-it Yang, Pa Jau, Dum Bung, Hpun Lum Yang hte Woi Chyai hpyen yen dabang ni hkan na magam gun Sara/ num ni sa du sharin ai re.
Ya aten hkawmsa hkawmwa yak ai hpyen yen mungshawa ni hta mung hkamja lam hte seng ai ningmu jahpaw ai lam nlu galaw ai rai yang myusha ni a matu grai nan sum machyi hpa langai re. Ndai zawn re wuhpung wuhpawng ni law law paw pru wa na hpe mung myit mada ai lam KDG kawn tsun da ai.
Nhtoi 5 ya tup galaw mat na wunkat hta shara shagu de na du sa ai magam gun ni hte sharin sara ni yawng pawng yang marai 20 jan shang lawm sharin hkaja nga ai re hpe mung chye lu ai.
