Manmaw Chyum Jawng a 2020-2021 hpaji ladaw jawng hpaw nhtoi htawt sit masat
Manmaw Ginwang, Jinghpaw Wunpawng Hkalup Hpung Chyum Jawng (KBBS) a 2020-2021 hpaji ladaw hpe September shata praw 1 ya shani kaw nna jawng hpaw hpang sa wa na re lam chye lu ai.
Du wa na September shata praw 1 ya shani kaw nna L.Th Program, Diploma Program hte shata kru chyum laika hkaja ai program kaw nna jawng ma ni yawng gaw jawng de du zup ra na hte Special English program hta sharin hka ja na jawng ma ni gaw dai shani kaw nna jawng hpaw hpang sa wa na re.
Jinghpaw Wunpawng Hkalup Hpung Chyum Jawng (KBBS) hta L.Th Program, Diploma Program, shata kru chyum laika hkaja ai program hte Special English program ngu nna lamang program hpan 4 garan da ai re.
L.Th program hpe sharin hkaja mayu ai jawngma ni gaw tsang 9 awng da ra na, Diploma program hta sharin hkaja mayu ai jawngma ni gaw tsang 8 awng da ra na, shata kru chyum laika hkaja ai program hta gaw hpaji madang nmasat ai myit lawm ai ni yawng sa du sharin hkamla mai ai hte tsang 10 awng da nna English hpaji hpe matut hkaja sharin la mayu ai ramma ni a matu Special English program hpe mung dai ning kaw nna hpaw hpang da sai lam, Manmaw Ginwang, Jinghpaw Wunpawng Hkalup Hpung Chyum Jawng (KBBS) a Hpaji Up Lasi Shawng pan tsun ai.
Jawng jarik hpe L.Th program hta gumhpraw lap sen sanit mun manga ( 750000 Kyast), Diploma program hta sen sanit mun masum (730000 Kyast) hte shata kru chyum laika hkaja ai program hta sen mali ( 400000 Kyast) masat da ai re.
Dai ning gaw COVID-19 ana a majaw grai hkrit tsang ra ai hkying ten re hte maren jawng hpaji sharin sa wa na jawng ma ni mung jawng wang kata kabye shang ai kaw nna nhtoi 21 ya jawng wang shinggan pru sa lam nmai galaw ai re majaw jawng jarik hte ra ai lam ni hpe tau hkrau hkyen lajang sa wa ra na lam ndau laika hta tang madun da ai.
July shata htum ai maga de jawng ma zup na matu ndau laika shapraw da ai raitim seng ang ai ni hte bawng ban jahkrup ai shaloi nmai hpaw shi ai lam tsun ai majaw September shata hta nhtoi htawt sit ai re.
Jawng bai hpaw sa wa ai ten hta mung mungdan Asuya a matsun hte maren tup hkrak hkan nang hkan sa nna sharin na rai nhtawm jawng hpaw nhtoi hpe September praw 1 ya hta masat da ai raitim mungdan Asuya a ndau shana wa ai hta hkan nna galai shai wa mai ai re hpe mung ndau laika tsun da ai re.
Manmaw Chyum Jawng hpe 2014 ning August shata praw kaw nna hpaw ninghtan hpang da ai rai nhtawm jawng hpaw hpang ai kaw nna dai ning du hkra rai yang jawng ma yawng 200 jan awng pru la lu sai re hpe mung chye lu ai.
