Chyangmu Ka-ni nanghpam dawn jasan chyum sharin jawng kaw tsi mawan garum

Chyangmu Ka-ni nanghpam dawn jasan chyum sharin jawng kaw Health Care Christian Fellowship ni kaw nna August shata praw 2 ya shani tsi mawan sa du garum jaw ai lam na chye lu ai.

Health Care Christian Fellowship ni kaw nna  tsi mawan sa du garum jaw ai lam gaw ndai lang shawng nnan lang re hte ya aten Chyangmu Ka-ni nanghpam dawn jasan chyum sharin jawng hta chyum hpaji sharin hkamla masha marai 190 nga ai lam chye lu ai.

“Nanghpam lu sha ai ni re majaw masha shan hpyi ntsa hta byin chye ai ana, sumbram, maru, waw tsi, makret makrat mai tsi ni hpe madung dat garum shingtau ya ai hte kaga tsi rung lung ra ai ni hpe mung tsi rung lung na mahkrun hku nna garum ya ai re” nga nna Chyngmu Ka-ni nanghpam dawn jasan ginra chyum sharin jawng up Sara Kaba Myitung Kyang Bawm tsun ai.

COVID-19 aten ladaw laman yak hkak jam jau la ai lapran hta ya na zawn tsawra myit shawang kaba hte manu dan ai tsi mawan ni hpe wa du garum jaw ai majaw kabu chyeju dum ai lam, Sara Kaba matut tsun ai.

Chyangmu ginra hta COVID-19 ana zinli makawp maga lam hpe dingyang galaw nga ai rai nna, shinggan manam jahkrum ai lam nnga ai sha, lockdown jahkrat nna tinang buga ginra hpe yawng jawm makawp maga nga ai lam chye lu ai.

Chyangmu Ka-ni nanghpam dawn jasan chyum mungga sharin jawng hpe 2014 ning kaw nna hpaw hpang ai hta, masat yan (1) kaw nna masat yan (24) du hkra rai yang jawng yu ai masha yawng marai 8000 jan nga sai lam chye lu ai.

Ya aten COVID-19 aten ladaw laman, Chyangmu ginra hta Ka-ni nanghpam lu sha masha tsa lam 80% daram bai law jat nga sai re hpe mung na chye lu ai.

Photo Credit; Ginjaw Ginjaw