Jinghpaw mung kata tara nshang nhprang sut rai htu shaw sha ai lam yawm wa lu na matu web mining cadaster ladat hte galaw sa wa na

Jinghpaw Wunpawng mungdaw kata na nhprang sut rai hte seng ai shiga ni hpe mungshawa ni aloi sha chye lu na matu web mining cadaster hte Mobile Application shachyen ya ai lamang hpe August shata praw 5 ya shani hta  Myitkyina-shatapru Amber Palace Hotel shara kaw galaw la lu sai lam chye lu ai.

Ndai lamang hta web mining cadaster hte Mobile Application ngu ai hpan lahkawng hpe madung hku nna  sang lang dan ai re.

Web mining cadaster ngu ai gaw anhte Jinghpaw Wunpawng mung hta htu shaw sha nga ai Lung Seng, Ja, Nhprang sut rai, Hpun ni hte seng nna chye mayu ai lam ni hpe mai yu ai, lamu ga sumla ni mai yu ai, list ni hpe download mai galaw ai re.

Bai nna langai mi gaw Mobile Application hpe off line hku nna mai yu na matu galaw da ai re. Dai hta gaw nhprang hte seng nna nam kawn shingra tara, Ja, Lung seng, Tara Upadi ni hte seng ai  Application re.

“Web mining cadaster ladat a yaw shada lam gaw ya anhte kaw e grau na gaw abrang alang chye lu na hpe yaw shada ai re. Mungshawa nnga, Asuya nnga kadai mung tinang a mungdaw kaw e kadai ni, gara company ni hpa baw nhprang ni hpe gara shara kaw htu sha nga ai hpe chye wa na, ndai zawn re shiga ni hpe chye wa na. Tara nshang htu shaw sha nga ai ni hpe chye ginghka wa na matu ngu nna yaw shada ai re.

Mobile Application a yaw shada lam chyawm gaw law, Tara Upadi hte seng ai lam ni hpe laika buk hte hpai hkawm na matu nloi ai, bai nna internet hku na yu ga nga timmung tsan ai shara, internet nlu ai shara ni grai nga ai, dai zawn re shara hkan hta off line hku nna anhte a tara upadi hpe mai hkaja  lu wa na matu, tinang a ginra tinang ahkaw ahkang ni hpe tara upadi chye ai marang e makawp maga lu wa na matu hte Tara Upadi hte hkrak hkan nang hkan sa lu wa na matu re. Ndai mungmasa la ni, mungshawa ni hku nna ndai zawn re tara nshang ai hku htu shaw sha ai lam ni hpe grau na galai shai wa na matu seng ang ai de shiga jaw nna, tara nshang ai lam ni hpe shayawm jahkrat wa lu na matu, Tara Upadi lam ni hta galai shai wa lu na matu yaw shada ai re ” nga nna TANKS komiti malawm rai nga ai Mahka Myu Awng tsun dan ai.

Ndai lam hpe daining kaw nna masum ning du hkra TANKS ni kawn madung woi awn galaw sa wa na rai nhtawm hpang de gaw Asuya ni kawn web mining cadaster hte seng nna chye lang, chye hparan ai masa nga wa ai rai yang Asuya ni kawn tara shang jum lang jum tek wa na matu myit hkrum da sai lam, Mahka Myu Awng matut tsun dan ai.

TANKS kaw nna gaw tara nshang htu shaw sha ai lam ni nga wa ai raitim ahkyak la ai lam n galaw na re hte, yaw shada lam hte maren mungshawa ni chye ging chye mai ai shiga ni hpe sha ginlen ya na re lam TANKS kaw nna chye lu ai.

Daini galaw mat wa ai ndai lamang hpe Jinghpaw mungdaw Asuya hkringmang rai nga ai shingra nhprang hte shingra grupyin gawn hkang hkringmang magam dap ni hte Taransparency and accountability Network Kachin State (TANKS) ni pawng hpawm nna galaw ai re hpe mung chye lu ai.