Ningpawt ninghpang rep chywi wunkat hpaw hpawng galaw
Wunpawng Mungdan Shanglawt Asuya, Amyu Shayi Hpung Ginjaw kaw nna lit la hpaw sharin ya ai ningpawt ninghpang rep chywi wunkat hpaw hpawng lamang hpe August shata praw 7 ya jahpawt hkying 7:00am aten hta Laiza Muklum Htunghking Rida shapan ginra kaw galaw ai re.
Hpawng hta amyu shayi hpung ginjaw komiti ningbaw malai Hpawmi Hkangda Roi Nan kaw nna hpawng hpaw shatsam mungga shaga ai rai nna, Rev. Sumlut Gun Seng kaw nna Karai Mungga hte n gun jaw, akyu hpyi ai hte hpawng hpe shangut la lu sai re.
Wunkat hta rep chywi hpaji hpe Saranum Kaba Labya Seng Tawng kaw nna madung lit la sharin ya na rai nna, num/la bu hpun palawng hpan hkum chywi ai hpaji ni, tinang chwi ai arung arai hpe gat lawk de shang wa hkra gara hku galaw mai ai ladat ni, sedaw, human right, short pick games, child right, gender based violence hte kaga chye ging chye mai ai hpaji ni hpe sharin ya na re lam chye lu ai.
Rep chywi hpaji hpe sharin la ngut sai amyu shayi ni gaw tinang dabang kata hta bai ginlen ya lu ai kaw du hkra sharin sa wa na hte rep chywi hpung jat chye la sai ni hpe mung n hpye hpan hkum chywi sharin nna gat lawk langai byin tai wa lu hkra galaw sa wa na re lam, Amyu Shayi Hpung Ginjaw Komiti Amu Madu Saranum Nbaw Ja Lung tsun dan ai.
Rep chywi wunkat hpe shata 3 tup sharin sa wa na rai nna, Wunkat hta Je Yang, Hpun Lum Yang, Dum Bung, Woi Chyai, Sha-it Yang, Maga Yang hte Laiza kaw na amyu shayi sha ni marai 15 lawm ai lam, dai amyu shayi marai 15 kaw na dawn jan atsawm marai shapraw nna ningtawn ai amyu shayi marai 3 hpe kan bau bungli hta akyu jashawn lu na matu rep chywi jak langai hpra masat masa shagrau na matu hkyen lajang da ai lam nga ai re hpe mung chye lu ai.
Ningpawt ninghpang wunkat hpe 2018 ning December shata praw 1 kaw nna hpaw hpang ai hta, ndai lang hte rai yang 3 lang du sai lam, rep chywi hpung jat wunkat hpe gaw kalang hpaw lu sai hte 2 lang ngu na hpung jat wunkat hpe mung matut hpaw sa wa na masing nga ai re lam, Amyu Shayi Hpung Ginjaw kaw na chye lu ai.
