Jarit mayan na IDPs camp nkau hta International Youth Day lamang galaw
Sha-it Yang IDPs camp hte Hpun Lum Yang IDPs camp kaw Genter Based Violence (GBV), Kachin Development Group ( KDG) hte Youth Center ni kaw nna woi awn nhtawm, International Youth Day lamang hpe August shata praw 8 ya shani hkying 10:00am kaw nna hkying 3:00pm aten du hkra galaw ai lam chye lu ai.
Lamang hta mungkan ramma masat nhtoi byin wa ai labau hpe woi hkaja ai rai nna, social game lamang hte gawdin shingjawng lamang ni galaw ai lam chye lu ai.
International Youth Day lamang galaw ai yaw shada lam hpe GBV Lithkam Saranum Hpaudaw Nu Ra tsun ai hta, “num/la mahta nna garan ginhka ai lam ni hpe shadang yawm wa lu na matu, ramma ni a hpaji lam, sut masa lam, shimlum lam, shinggyim lai len ni, hkamja bawngring lam, simsa lam ni hpe bawngring rawt jat wa lu na matu hte mazut roi rip ai lam ni, nrap ra ai lam ni nang hpam lu sha ai lam yawm wa lu na matu yaw shada let mungkan ramma masat nhtoi hpe shaning shagu woi awn galaw nga ai re” nga nna tsun ai.
International Youth Day lamang hpe shaning shagu woi galaw yang she ramma ni hpaji hparat lam hta kung kyang ai ni byin tai wa lu na re, COVID-19 aten ladaw laman shinggan de npru hkawm lu ai majaw ramma ni a myit masa ni hten za wa nga ai hpe mu mada lu ai, ramma ni hpe lam madun hpaji jaw woi zinlum la na lam tsun lajin da ma ai re.
Youth Day lamang hpe Sha-it Yang camp kaw August shata praw 7-8, 2 ya tup galaw ai rai nna, ya na zawn International Youth Day lamang hpe jarit mayan hpyen yen dabang ni hta lai wa sai 2018 shaning kaw nna shaning shagu galaw nga dingyang re hpe chye lu ai.
