Manau shadung maka hte galaw da ai mare numshang shadaw jung

Hpakant Ginwang Htunghking Hpung kaw nna woi awn nhtawm, Hpakant Gaiwang kata, Aye Mya Tayar mare shang wa ai shara kaw manau shadung maka kumla hte galaw da ai mare numshang masat shadaw hpe August shata 14 ya jahpawt hkying 8:00am aten hta jung masat la lu sai lam chye lu ai.

Matut nna Lawnghkang de sa wa ai Pan Pin lungseng masat shadaw hte Seng Tawng sa wa ai lam Mashi Kahtawng numshang masat shadaw hpe jung sa wa na lam chye lu ai.

Mare numshang masat shadaw hpe grau ngangkang nganggrin na matu wut, hpri hte galaw da ai rai nna, masat shadaw hta law malawng manau shadung maka hpe shalawm da ai hte madung gaw tinang ginra kaw Jinghpaw Wunpawng amyusha ni a masat kumla hpe shadan shadawng mayu ai majaw re lam, Hpakant Ginwang Htunghking Hpung Ningbaw Du Wa Maran Zau Shan Lum tsun ai.

Mare numshang masat shadaw hta manau shadung shakap jai lang ai yaw shada lam hpe Hpakant Gaiwang Ningtau Ningbaw Salang Nabau La Raw tsun ai hta, “mare numshang hta e anhte amyu sha ni a manau shadung maka moi jiwoi jiwa prat kaw na shakap lang wa ai, anhte amyu ni a maka kumla hpe shakap ai ngu ai gaw, anhte ni a myit masa hta gaw anhte lamu anhte ga, anahte a mungdan anhte mare anhte buga anhte shara re ngu ai hpe asuya kadai mi naw uphkang taw nga ai raitim, ndai shara ndai lamu ga gaw, anhte mungdan anhte lamu ga re ngu ai dai hpe lachyum la mayu ai ga re” nga nna tsun ai.

Masat shadaw hpe lawan jung mayu ai lam gaw ra lata poi a hpang de ganing re mungmasa bai pru wa na re nchye ai majaw, ya aten laman hta tinang lamu ga shara, mare buga numshang hpe lawan lajang la lu na matu dawdan ai masa re lam, salang wa matut tsun ai kaw na chye lu ai.

Masat shadaw jung ai lam hpe Asuya kaw ahkang hpyi nna, hkrat ang ai ja gumhpraw ni hpe Hpakant Htunghking Hpung hte tinang Gaiwang kata mare kahtawng ni kaw nna ja gumhpraw jawm shaw nhtawm, 2020 ning shaning nnan kaw nna galaw hpang wa ai rai nna, masat shadaw langai mi hta Myen gumhpraw sen 30-50 lapran hkrat ang ai ngu ntsa lam sawn maram da ai re lam chye lu ai.

Hpakant Ginwang kata Gaiwang (10) nga ai rai nna, Ginsi Gaiwang, Mazup Yang Gaiwang hta mung mare numshang shadaw jung nga sai lam, matut nna kaga gaiwang ni hta mung mare numshang masat shadaw jung na matu hkyen lajang nga ai lam, Hpakant Ginwang Htunghking Hpung kaw na chye lu ai.

Photo Credit; Hpakant Gaiwang Htunghking