Wunpawng Mungdan Shanglawt hpung shang masha ni hpe ga shaka (Oath) jaw hpawng galaw
Wunpawng Mungdan Shanglawt hpung shang masha ni a ga shaka (Oath) jaw hpawng hpe August shata 18 ya shani hkying 10:00am aten hta Laiza Muklum Ginjaw Hkamja Dap, Wunjat Gawknu kaw galaw ai re.
Ga shaka jaw hpawng hta Wunpawng Mungdan Shanglawt hpung shang majing ga shaka hkamla ai marai 31 hpe Mungchying Magam Dap Pati Komiti Amu Madu Salang Maran Awng Gun kaw nna ga shaka (Oath) jaw ai lam galaw ai re.
Hpawng hta Mungchying Magam Dap Pati Komiti Lakung Tingnyang Up Salang Kadang Manau Tu Awng kaw nna hpung a tara hte lit hpe hti n-gun jaw ai lam galaw ai rai nna, Mungchying Magam Dap Pati Komiti Shingtau Tingnyang Up Salang Lamai Seng Hkum kaw nna numhtet shatsam mungga tsun ai hta,
“Wunpawng Mungdan Shanglawt hpung shang majing rai sai myit rum ni anhte a du na ra ai aten hta anhte kaning re ai nbung, kaning re ai laru, kaning re majan byin hkrum hkra na anhte nchye ga ai. Raitim mung anhte gahkyin gumdin ai lam myit ngangkang ai lam, anhte a yaw shada ai pandung du lu hkra ngu ai hpe n-gun da ting nna jawm pawng hpawm rai nna gawde sa wa yang, dai ni anhte myusha ni anhte a mungdan awngdawm ai de du lu na re, ndai gaw anhte yawng a myit kraw lawang hta tawk hprut bang da nna dai ni anhte a hpung hpe grau nna rawt jat ngangkang ai Wunpawng Mungdan Shanglawt Hpung byin tai wa hkra yawng jawm shakut shaja sa wa ga” nga nna tsun ai.
Dai ni ga shaka hkamla ai ni gaw Hkamja Dap kaw na marai 13, Htunghking Pati (Hkai Rem, Nam Maling, MKD, Htunghking) kaw na marai 11, Sut Masa Magam Dap kaw na marai 2, DGA kaw na marai 1, Hpaji Dap kaw na marai 3 hte Shiga Magam Dap kaw na marai 1, ga shaka hkamla sai lam chye lu ai.
