(42) ning hpring Wunpawng Mungdan Shanglawt Amyu Shayi Masat Ninghtoi lamang galaw

Wunpawng Mungdan Shanglawt Amyu Shayi Hpung Ginjaw kaw nna woi awn nhtawm, (42) ning hpring Wunpawng Mungdan Shanglawt Amyu Shayi Masat Ninghtoi hte shagrau sha-a hpawng lamang hpe Amyu Shayi Hpung Ginjaw Komiti Rung kaw August shata 19 ya shani hkying 10:00am aten hta galaw la lu sai re.

Hpawng lamang hta nawku daw jau lamang ni galaw ai sha n-ga, laksan hku nna Amyu Shayi magam gun ladaw 20 ning hte10 ning hpring ai amyu shayi ni marai 5 hpe shagrau sha-a ai lam galaw ai hta, amyu shayi magam gun ladaw 20 ning hpring ai Amyu Shayi Hpung Ginjaw Komiti kaw na marai 1 hpe ja dazik hte shagrau lakmat hpe shagrau jaw ai rai nna, magam gun ladaw 10 ning hpring ai Amyu Shayi Hpung Ginjaw Komti kaw na marai 1 hte Sinpraw Ginwang Ginjaw Amyu Shayi Hpung Komti kaw na marai 3 hpe gumhpraw soi kachyi hte shagrau lakmat masat shagrau ai lam chye lu ai.

Maigan Mungdan shara shagu hta mung amyu shayi ni shang lawm ai majaw awngdang ai lam ni law law nga ai re, Mungdan ting hta na amyu shayi magam gun ni hte amyu shayi ni yawng mung, Wunpawng amyusha ni a rawt jat galu kaba sa wa na lam hta yawng jawm shakut shaja ra na lam, Amyu Shayi Hpung Ginjaw Komiti Ningbaw Hpawmi Nangzing Kaw Hpang kaw nna n-gun jaw ga tsun ai.

“Dai ni anhte amyu sha ni gaw grai naw grit nem ai mungdan lung nga ninglen anhte mungdan anhte nlu nga ai, anhte lamu ga hpe anhte nlu madu lu ai ten re majaw, Wunpawng Mungdan Shanglawt Hpung a woi awn ai kata kaw anhte amyu shayi hpung ni grau nna bawngring rawt jat ai lam hte e anhte kashu kasha ni hpe shalat shaprat ai lam, amyu sha ni bawngring wa na magam hta e Mungdan bawngring wa na magam hta e, Mungdan a magam bungli hta e grau grau dam lada hkra dai ni wunpawng amyu shayi ni hte wunpawng amyu sha ni galu kaba wa hkra matut nna galaw sa wa na matu shatsam dat mayu ai re” nga nna tsun ai.

Amyu shayi hpung a rawt jat galu kaba sa wa na lam hta tinang atsam nga ai hte, dangdi dangdep ai daram madi hpadaw shakut sa wa na lam, amyu shayi magam gun ladaw 20 ning hpring masat shagrau hkamla ai Amyu Shayi Hpung Ginjaw a Kahkyin Gumdin Magam lit hpe gun hpai nga ai Jan. Hpawmi Kareng Hkawng Yang tsun ai.

Laksan Laiza Muklum Amyu Shayi Hpung ni woi awn ai hte Seng Lu Ma Shapan Jawng hta amyu shayi marai 40 jan shang lawm ai hte amyu shayi masat ninghtoi lamang hpe galaw ai re.

Ya na zawn COVID-19 aten ladaw laman Amyu shayi masat ninghtoi lamang hpe galaw ai lam gaw, Wunpawng Mungdan hte Maigan Mungdan shara shagu kaw nga ai amyu shayi ni yawng ndai nhtoi hpe galoi mung myit dum nga na matu yaw shada ai lam, Laksan Laiza Muklum lawk 5 kaw na Amyu Shayi Ningbaw Jan. Hpawmi Layawk Lu Htoi tsun ai.

Lam shagu hta Amyu shayi ni shanglawm ai wa shaloi magam bungli ni awngdang wa ai hpe mu mada ai majaw, 1978 ning August shata 19 ya shani hta Hpawmi Nahpaw Kaw Mai woi awn nna, Wunpawng Mungdan Shanglawt Amyu Shayi ninghtoi hpe masat nna Amyu Shayi Hpung hpe hpaw hpang wa ai daining 42 ning hpring sai lam chye lu ai.

COVID-19 aten ladaw re majaw Wunpawng Mungdan Shanglawt Amyu Shayi Masat Ninghtoi hpe daining gaw shawa law law hte hpawng chyawm ai hku n galaw ai sha, Ginwang Ginjaw, Ninghtawn ni hta tinang nga ai shara kaw galaw ai lam na chye lu ai.

Photo Credit; Pawm Hkun Awng, Mai Mai Seng Lahpai