Sumpra Bum hte Putao lam lapran na Hpung In Hka mahkrai daw mat ai majaw masha marai 2 hkala hkrum

Sumpra Bum kaw nna Putao de sa ai lam kaw na Hpung In Hka mahkrai gaw August shata 21 ya jahpawt 4:00am aten daram hta leng 6 lawm ai Bilat htaw Modo lai ang ai aten daw nna, Modo hka de di hkrat mat ai hta, Modo kaw jawn lawm ai masha marai 2 hkala hkrum ai lam ginra masha ni shana wa ai kaw na chye lu ai.

Dai mahkrai gaw Sumpra Bum kaw nna deng 20 daram tsan ai shara kaw nga ai rai nna, mahkrai daw hten mat ai majaw hkawm sa hkawm wa lam gan jahkring da ra ai sha n-ga hkala hkrum ai Modo gawt ai wa hte Modo hpang hkan ai wa hpe Putao tsi rung de sa sa na re lam chye lu ai.

Hpung In Hka mahkrai kaba daw hten mat ai majaw hkawm sa hkawm wa lai mai hkra hkyak hkyak mahkrai bai galaw na matu mung hka kaba ai aten ladaw re majaw bat mi daram gaw naw na na masa nga ai lam, ndai laman gunrai htaw shalai ai lam hte hkawm sa hkawm wa mung masha ni yak hkak dut dang wa mai ai lam, Sumpra Bum ginra masha langai tsun dan ai.

“Madung gaw Putao ginra lahta daw kaji mi gaw yak wa na masa nga ai, ndai yinam nhkoi shi ai laman, gunrai htaw shalai dut dang ai lam gaw nga na re, gunrai manu ni rawt wa na,  hkrunlam hkawm ai ni a matu shata 2/3 daram gaw loi mi jam jau ai lam gaw nga na re” nga nna tsun dan ai.

Dai mahkrai hpe lai wa sai 2004 ning daram hta Asuya kaw nna galaw da ya ai mahkrai raitim, mahkrai loi tsam mat ai majaw daw mat ai masa nga ai lam, daw hten mat ai mahkrai hpe mung lawan dik ai hku nna galaw ya shangun mayu ai lam ginra masha ni tsun da ai kaw na chye lu ai.

Photo Credit; EPN