Ninggawn Daju Pati Komiti Salang ni a zuphpawng galaw la lu
Ningawn Daju Pati Komiti Amu Madu, Ningtau Amu Madu, Rung Up ni a bungli hkri dun bawngban hpawng hpe August shata 28-29 ya laman Laiza Muklum Padang Rung, Ninggawn Daju Pati Komiti Rung kaw galaw la lu sai re.
Hpawng hta KIO hpung pati hte seng ai lam hpe woi hkaja ai rai nna, lawu tsang komiti ni tang shawn ai hpe bawngban ai hta, rung hkri dun lam, shata shajup, shaning shajup hte seng ai lam, KIO hpung shang shawk shawn hkrang hte seng ai lam, Ningawn Daju Komiti ngu ka lang na lam, Wunpawng Mungdan Shanglawt Hpung shang lam masan laika buk garan na hte seng ai lam, hkungran ga shaka nla shi ai magam gun ni hpe pawng hpawm hkrungran ga shaka jaw ya na lam, 5 ning lahta na magam gun amyu shayi ni hpe shagrau lakmat jaw na hte seng ai lam ni hte kaga matut galaw sa wa na shawng lam bungli masing ni hpe bawngban la lu sai lam chye lu ai.
Ninggawn Daju Komiti Tingnyang Up Salang Maran Tawng La kaw nna zuphpawng ginchyum dat mungga shaga ai hta,
“Ginjaw Komiti kaw nna woi awn nga ai ninggawn mungmasa lam yan kaw anhte a pandung, mungshawa rawt malan amyu sha a pandung hpe galoi mung tinang a myit hta shingran pra rai mu nna shakut galaw yang chyu sha anhte a magam bungli awng dang na re, majoi poi sa ai hku shawa bungli hku sha sawn yang anhte a bungli awngdang ai daram n awng dang na re majaw, KIO hpung pati tsang shagu gaw amyu sha, mungshawa rawt malan a daw hpum dawnu akri tawng rai ga ai ngu hkam la nhtawm, madu tai nna jawm woi gawgap yang sha shawng de sit wa na re” nga nna tsun ai.
Zuphpawng galaw ai yaw shada lam gaw Wunpawng Mungdan Shanglawt Hpung (KIO) hpe greng grak ngangkang nna masan sa awngdang ai mungmasa hpung byin tai wa hkra woi awn hkrang shapraw sa wa na matu rai nna, Ninggawn Daju Komiti Rung hkridun hpawng galaw ai gaw, ndai lang hte rai yang 5 lang du sai lam chye lu ai.
Photo Credit; Mai Mai Seng Lahpai
