Ramma hte sut masa sharin bawngban hpawng galaw

Sammung Htunghking Ramma Dap kaw nna woi awn nhtawm, Ramma hte sut masa sharin bawngban hpawng hpe Kuthkai Lawk 8, Sammung Wunpawng Laili Laika Htunghking Ginjaw Rung wang kaw September shata praw 3-4 ya laman galaw na lam chye lu ai.

Sharin hpawng hta Dr. Maji Yaw Htung kaw nna Ramma hte sut masa ngu ai ga baw hte madung sharin ya ai rai nna, Saranum Jangmaw Easter hku nna tatut galaw nga ai sut masa hte seng nna ginlen sharin ya na re hte sut masa hpe tinang nan tatut galaw nga ai Shadang Jumzang Dau Di hpe saw shaga nhtawm mahkrum madup ginlen ai lam galaw na re hpe chye lu ai.

Wunpawng Ramma ni sut ningmu nga na matu, sut masa hte seng ai tatut galaw chye wa na matu hte sut masa hta wunpawng ramma ni tinang lagaw tinang chye tsap ai bungli hpe chye galaw wa na matu yaw shada let woi awn galaw ai re lam, Sammung Htunghking Ramma Ningbaw Sara Shekoi Dau Ze tsun ai.

“Kaga amyu ni hte shingdaw yang wunpawng ramma ni gaw sut masa lam hta gawng kya ai re majaw, wunpawng ramma ni mung kaga amyu ni zawn ramma ten kaw na nan sut masa hpe grak lagra rai chye galaw ai, bungli hpe chye jum ai, sut masa hpe chye hpang ai, sut masa hte chye tsap ai ramma ni byin tai wa na matu” nga nna tsun ai.

COVID-19 aten byin nga ai aten ladaw re majaw sharin hpawng galaw na lam hpe Asuya kaw ahkang hpyi nhtawm, Mungdan Asuya a masat da ai lam hte maren galaw ai re lam, Sara matut tsun ai.

Sharin hpawng hta Sammung Wunpawng Laili Laika Htunghking Hpung kata Ginwang 19 kaw na ramma ni marai 16 hte Mungmyit Sinli ramma ni, Lashio Dakkasu JLH kaw na ramma ni yawng marai 31 sa du sharin hkamla nga ai rai nna, ramma hte sut masa sharin bawngban hpawng hpe daining shawng nnan lang galaw ai re lam chye lu ai.

Photo Credit; Maw Nuk Shekoi