KIO uphkang ginra ni hta Quarantine bai rawng ra
KIO uphkang ginra hta Quarantine bai rawng ra na lam, Ginjaw COVID-19 Ana Zinli Makawp Ninghkap Komiti kaw nna, September shata praw 8 ya shani sadi jaw ndau shabra da ai kaw na chye lu ai.
Ndai lam hte seng nna, Ginjaw COVID-19 Ana Zinli Makawp Ninghkap Komiti Amu Madu Dukaba Lahpai Hing Wawm tsun ai hta“Myen mung kata hta byin ai lam ni grai law wa ai. Anhte mu mada lu ai mung, ya na COVID-19 ana gaw gara de mung nsa, ana byin ai ni hte mung nhkrum, n shaga yu ai, hkra hkrat ai lam nnga ai ni hta mung ana mu jep ai ni nga ai re majaw, anhte ni kaw nna gaw ya grai sadi ra ai lam ni nga sai. Dan re lam ni anhte ni kaw n myit mada ai byin wa chye ai hpe anhte sadi maja ai lam re” nga nna tsun ai.
Shinggan kaw nna, du shang wa ai Mungshawa ni gaw Munglai Hkyet Quarantine dabang hta hkamja lam jep joi hkam la ra na rai nna, Hpung sara ni hte Du salang ni gaw, Myitkyina Hotel hta hkam la ra na re lam Dukaba matut tsun ai.
Laiza Muklum de shang wa ai kadai raitim, Maisak Pa Check point gate shinggan kaw nna du shang ai rai jang hkamja lam jep hkam dabang Quarantine 14 ya hkam la ngut ai hpang she Laiza Muklum de shang lu na lam hte mare kata hkawm sa ai ni yawng mung, Mask shakap nna sha pru hkawm ra na re lam ndau shabra laika hta tsun da ai.
Ya aten COVID-19 ana zinli gaw lani hte lani grau grau sawng wa nga ai sha n-ga anhte a buga ginra makau grup yin de du hkra, lawan ladan kap bra, chyam nga sai re hpe mung chye lu ai.
