KIA Dap Dung 36 ginra hta gasat gala majan matut byin
Mungmyit Sinli Ga (Kachin Sub-state) Munggu Ginwang, KIA Dap Ba 6, Dap Dung 36 ginra, Hpun Pyen Yang kaw September shata 14 ya shani hkying 1:50pm aten hta KIA, MNDAA dap hpawm ni hte Myen Hpyen Dapnu 88 kata na hpyen hpung ni gasat gala majan matut byin ai lam na chye lu ai.
Majan byin ai shara gaw, mani shawng shani byin ai shingdu kaw rai nga ai, anhte kaw na ni hte MNDAA ni ginra gawan sa ai ten, ang katut gasat poi byin ai re, nga nna shawng lam na lit nga ai salang langai tsun dan ai.
Myen hpyen hpung ni pru mat wa ai lam nnga shi ai majaw, naw maja hkat nga ai lam, salang wa matut tsun ai.
September shata 11 ya shani kaw nna KIA Dap Dung 36 ginra de, Myen hpyen hpung ni shamu shamawt htu lung wa ai majaw shani shagu ngu na gasat gala majan bai byin wa nga ai re.
Gasat gala majan a majaw, Man Kawng mare na mungshawa ni mung tinang a dum nta de nhtang wa ai lam nnga shi ai raitim, dum nta hte yi sun hkauna ni hpe wa yu gawan ai zawn re gaw nga ai lam, buga masha ni kawn chye lu ai.
