Hpyen magam gun ni hpe Ka-ni nanghpam tsa chyaru hte seng nna hpaji jaw majat jaw ai hpawng galaw
Greng Grak ai hpyen magam gun ni byin tai wa lu na matu hpyen magam gun ni hpe Ka-ni nanghpam tsa chyaru hte seng nna hpaji jaw majat jaw ai hpawng hpe Laiza, Hka Hkan Hka Dabang kaw September shata 16 ya shani kaw nna September shata 30 ya laman galaw na lam chye lu ai.
Ya na zawn hpyen magam gun ni hpe Ka-ni nanghpam tsa chyaru hte seng ai hpaji jaw majat jaw ai hpawng hpe Dap Awn Daju a masing nga ai hte maren galaw sa wa ai lam rai nna, Wunpawng Mungdan kata hta greng grak ai, mungshawa dap shawa yawng kam hpa ging ai magam dap kaba byin tai wa lu na matu yaw shada let galaw ai re lam, Hka Hkan Hka Dabang Amu Madu Du Kaba Dabang Yaw Han tsun ai.
“Dap Awn Daju a masing nga ai hte maren, Dap Awn Daju kaw nna Dai Lawn Rung de matsun wa ai hte maren, Dai Lawn Rung kaw na masing kaba shaw nhtawm, komiti hpe main komiti hte sub komiti hku hpaw ai re, main komiti gaw G-1 tsang ni rai nna, sub komiti gaw Masat (2) Dap Nawng Daju Dap Up hku woi lit la nna ndai magam bungli galaw ai lam re. Wunpawng Mungdan hta mungshawa dap shawa yawng kam hpa ai magam dap kaba byin tai wa lu na matu gaw anhte magam gun masha ni greng grak ra ai re majaw, magam gun masha ni yawng greng grak ai magam gun ni byin tai na matu ndai lamang hpe galaw ai rai ga ai” nga nna tsun ai.
Hpawng hpe numdaw 2 hku galaw sa wa na rai nhtawm, September shata 16 ya shani kaw nna September shata 30 ya shani du hkra dabang kata hta nanghpam lu sha hte seng nna ningmu jahpaw ai lam ni, tsi mawan hte seng ai lam, myit hpaji hte seng ai lam ni hte Karai Mungga ni hpe madung sharin ya na rai nna, October shata praw 1 ya shani kaw nna 29 ya shani du hkra nam de tam lu tam sha shaman shakyang ai lam galaw sa wa na re hpe chye lu ai.
Hpaji jaw majat jaw hpawng hta Ginjaw Ginra, Masat (1) Dap Nawng Daju, Masat 2 Dap Nawng Daju, Masat (5) Dap Ba hpyen magam gun ni hte Laiza Gaiwang mungshawa hpyen hpung magam gun ni marai 22 sa du sharin hkamla nga ai hte matut nna mying jahpan hkapla da ai masha marai 79 nga ai lam chye lu ai.
