Pa Kahtawng hpyen yen mungshawa htinggaw 80 a matu, nta ningnan gap ya nga
KIO uphkang ginra kata na Pa Kahtawng hpyen yen htinggaw 80 a matu WPN (Wunpawng Ninghtoi) hte Man Maw garum ningtum hpung ni kaw nna pawng hpawm let nta nnan gap ya nga ai lam chye lu ai.
Nta ni hpe gawk 3 rawng ai hkrang hte gap ya ai rai nna ya hkyak hkyak nta nmai rawng sai, dum nta tsam mat ai htinggaw ni a matu madung yaw shada let gap ya taw ai re.
Nta gap hpang ai lam hpe laiwa sai August shata kaw nna gaw gap hpang taw sai rai nhtawm matut nna mung gaw gap nga dingyang re.
Nta ndai ni gaw gap da ya ai mung aten ladaw grai na sai re majaw nta shadaw ni n-ngang sai. Shakum kumba ni mung tsam taw sai. Bai nna hpri tsut mung marang gayun ai hte yinam ta du jang grai jam jau ai re nga nna hpyen yen mungshawa ni tsun dan ai.
Ndai nta galai gap ya na hte seng nna, seng ang ai salang ni hpe tsang hte tsang tang madun, shana da ai lam ni mung lang hte lang galaw ai rai nhtawm ndai kalang gaw shawng ningnan galai gap ya ai re lam Pa Kahtawng hpyen yen dabang Amu madu Maran Brang Seng tsun ai.
Pa Kahtawng Hpyen yen gaw KIO uphkang ginra kata nga ai rai nna Myen hpyen dap hte KIA majan a majaw 2012 ning kaw nna hpyen koi yen hkrum ai shara re.
Mung Myit Sinli Ga ( Kachin-Sub-State), Nmawk, Man Maw, Man Je hte kaga ginra rai nga ai Sinlum, Mai Hkawng, Bum Kahtawng, Zi-un, Loi Kang, Mahtang, Kawng Ja Yang, Maru Ying Zung hte buga 100 jan kaw na htinggaw 593, mungshawa yawng 2000 jan hpyen koi yen nga ai shara re hpe mung chye lu ai.
