Hka hpyen hkrum ai Jahtu Zup mare kaw na dum nta htinggaw 400 jan a matu malu masha, arung arai ni ra ahkyak nga

Lamu marang matut manoi htu sawng ai majaw Danai Lido lam mayan Jahtu Zup, Wara Zup mare kaw September shata 25 ya jahapwt hkying 2:00am aten kaw nna numdaw lahkawng lang ngu na hka bai kaba shang wa ai majaw, Jahtu Zup mare kaw na hka hpyen hkrum ai htinggaw 400 jan a matu malu masha, arung arai ni hkyak hkyak ra kadawn nga ai lam na chye lu ai.

Mare kata hka kaba shang wa ai majaw, dum nta htinggaw 400 jan hka hpyen hkrum mat ai re sha n-ga, dum nta yawng lawm mat ai htinggaw 23 nga ai lam, dum nta yawng lawm mat ai kun dinghku nta masha ni hta, shatgawk arung arai, hpu hpun palawng, malu masha ni mayak mahkak nga ai rai nna, hka hpyen hkrum ai Jahtu Zup mare masha marai 2872 gaw ya aten Jahtu Zup Hpungkyi Jawng, KBC nawku jawng wang hte RCM nawku jawng wang kaw shanu shing byi nga ai lam, Jahtu Zup Mare Lithkam U Swe Oo tsun dan ai.

Malu masha hte seng nna mare kawn lit la yu nga ai sha n-ga, KSPP, ၾက့ံခိုင္ေရး Party, NLD Party, mare kaw na Pyitu Tsit ni hte ginra garum ningtum hpung ni kawn sa du nhtawm, shat malu masha hpe hkyak hkyak lajang ya nga ai lam, Jahtu Zup mare kaw na Sara Htoi Awng tsun dan ai.

 “Marang gaw htu ding yang re hpawng dat htu dat yu rai, shana du jang shana ting htu, hka gaw aloi sha n yawm na shadu ai, 2 ya daram naw mara na masa nga ai, Modo lam ntsa na nta ni sha ngam sai, ngam ai nta ni yawng htawt kau sai, dum nta ni arung arai ni mung yawng ai gaw yawng mat ma sai rai nga ai” nga nna Sara matut tsun dan ai.

Danai Lido lam mayan, Jahtu Zup, Wara Zup mare kaw ndai lang hka kaba ai gaw shawoi kaba ai hta grau sawng ai rai nna, Hpakant, Sumpra Bum, Putao Ginwang Pan Nan Din mare ni hte kaga ginra ni hta mung, marang htu sawng nna hka kaba wa ai majaw, mungmare masha ni hkawmsa hkawm wa yak hkak hkrum nga ai lam na chye lu ai.

Photo Credit; Fb ##