Manmaw Ginwang Htunghking wang kaw manau shadung jung sa wa na
Manmaw Ginwang Htunghking hte Laili Laika Hpung kaw nna lit la woi awn nhtawm, Manmaw Ginwng Htunghking manau wang kaw October shata praw 1 ya shani kaw nna Htunghking manau shadung jung hpang na re lam na chye lu ai.
Htunghking manau shadung hpe ngangkang ai wut hte galaw sa wa na rai nna, hkrat ang ai ja gumhpraw ni gaw ntsa lam sen hkying mi jan sawn maram da ai lam, ndai hkrat ang ai ja gumhpraw ni hpe Manmaw ginra hta nga lai wa sai Wunpawng amyu sha ni, Manmaw Ginwang kata shanu nga ai hpung kanu kawa ni hte ramma ni hpe Internet line hku nna alu garum hpyi sa wa na lam, ginra masha ni kaw nna mung tsawra shawang myit hte jaw bang ai lam ni galaw sa wa na re hpe chye lu ai.
Manmaw Ginwang hta Htunghking manau shadung jung ai yaw shada lam gaw, Manmaw Ginwang hte seng ai Htunghking hte seng ai poi lamang kaba ni nga wa yang, amyu sha lam yan hta rawt jat galu kaba wa ai ramma ni hpe woi shalat shapan ai ginra langai byin tai wa lu hkra manau hpe akyu rawng ai hku jai lang sa wa lu na matu yaw sing da ai lam, Manmaw Ginwang Htunghking hte Laili Laika Hpung Ningtau Ningbaw, Manau Shadung Gawgap Komiti Ningbaw Salang Kareng Naw Tawng tsun dan ai.
“Manmaw Ginwang kata hta ginwang ting hte seng ai yawng hkra ka manawt lu ai, anhte na htunghking maka hpe masat masa galaw lu ai shara langai mi hkyak hkyak lai wa sai ten n lu galaw ai, ndai lang galaw ai hpang hkrat ai raitim, akyu rawng ai hku nna shaning 10 ning 20 ning a matu yaw sing nna galaw sa wa na re” nga nna tsun ai.
Ya na zawn Htunghking manau shadung galaw ai lam hta kaga ginra ni hta hpang hkrat ai lam nga ai raitim, akyu rawng ai hku nna manau wang hpe du na ra ai ten hta amyu sha ni law htam ai hku htunghking maka hpe ka manawt lu ai shara langai mi byin tai wa hkra jawm shakut nga ai re majaw, manau shadung hpe gaw de sa wa ai lam hta mung, makau grup yin hta shanu nga ai Wunpawng amyu sha ni hku nna lam madun n-gun jaw, hpaji jaw la na hpe myit mada ai re hpe na chye lu ai.
