KIA Dap Dung (9) ginra hta gasat gala majan byin
Mungmyit Sinli Ga (Kachin Sub-state), Kuthkai Ginwang KIA Dap Ba (6), Dap Dung (9) ginra, Hpaudaw makau kaw October shata praw 4 ya jahpawt hkying 8:15am aten kaw nna, minute 10 daram, Myen Hpyen Dap, Dapnu (99) kata na hpyen hpung ni hte KIA Dap Dung (9), Kung (1) hpyen hpung ni gasat gala majan byin ai lam chye lu ai.
Hkying 10:00am aten daram hta gaw, Hpaudaw lahta kaw shara jahkrat nga ai, TNLA, MNDAA hte AA pawng hpawm hpyen hpung ni hte Dapnu (99) ni gasat poi matut byin ai re lam, shawng lam na salang langai tsun dan ai.
Ya na hku sha rai yang gasat gala majan matut byin wa na masa nga ai, Myen hpyen ni gaw n gun 400 daram hte hpyen man 4 hku htu lung wa ai re lam, salang wa tsun ai.
October shata praw 3 ya shani hta mung, KIA Dap Dung (9) ginra, Tinggaw bum mare dingsa kaw Dap Hpawm ni nga ai shara de Myen hpyen hpung ni htu lung wa ai majaw gasat gala majan byin ai re.
Myen hpyen dap gaw, October shata praw 1 ya shani kaw nna 30 ya shani du hkra, hpyen shamu shamawt lam n galaw na matu, ndau laika shapraw da ai raitim, KIA Dap Dung (9) ginra de, Myen hpyen n gun 400 daram shamu shamawt htu lung wa ai majaw gasat gala majan byin nga ai lam chye lu ai.
