Du Mare Buga Hpung kaw nna, hpung masha ni hpe garum

Myikyina, Du Mare Hkalup Hpung kaw nna, COVID-19 aten hta Du mare lawk kata na hpung masha ni hpe October shata praw 5 ya shani malu masha garum jaw ai lam chye lu ai.

Garum jaw ai lam hte seng nna, Du mare buga hpung amu madu Hpungtau Sumlut Htoi Pan Naw tsun ai hta “Ya na COVID-19 aten hta anhte buga hpung masha nkau myi kaw bungli nnga mat ai zawn rai nna, tam sha yak mat ai lam ni nga ai re majaw, buga hpung kaw na alaw alam myi n raitim, hpung masha ni hpe galoi mung myitdum nga ai, tsawra myit madun lu na matu shakut ai lam re” nga nna tsun ai.

Garum jaw ai lam hta htinggaw myi kaw n-gu bye kru, sau rawng manga shi hte gala shapre joi mi hpra, htinggaw 930 jan hpe garum jaw sai lam chye lu ai.

Ya na zawn garum jaw ai lam gaw nawku hpung kaw nna, masing jahkrak tawn da let, garum jaw sa wa ai lam nre ai sha, byin wa ai masa hta hkan nna, jawm galaw ai lam re nga hpungtau wa matut tsun ai.

Lai wa sai April shata htum wa maga de mung, nawku hpung hku nna, buga hpung masha ni hpe malu masha garum jaw sai lam chye lu ai.

Photo, Labang Su Tu