Shingnan hpung shang masha hkalum shatsam hpawng galaw

Ninggawn Daju Komiti kaw nna lit la woi awn galaw ai, Wunpawng Mungdan Shanglawt Hpung, shingnan hpung shang masha hkalum shatsam hpawng hpe Laiza Muklum Padang Rung, Ninggawn Daju Komiti Rung kaw October shata praw 6 ya jahpawt hkying 10:00am aten hta galaw la lu sai re.

Hpawng hta Ninggawn Daju Komiti Shingtau Tingnyang Up Salang Hpunggan Zau Gun hte rau, Wunpawng Mungdan Shanglawt Hpung shang pati komiti salang ni sa du shang lawm ai rai nna, shingnan hpung shang masha ni hpe masat lakmat shagrau ai hte Wunpawng Mungdan Shanglawt Hpung shang masha ni hkan sa ra ai hpung a tara, hpung masha ni a lit hte hkansa ra ai tara lam ni hpe hti ai lamang galaw ai re.

Ninggawn Daju Komiti Shingtau Tingnyang Up (I) Salang Hpunggan Zau Gun kaw nna shingnan hpung shang masha ni hpe hkalum shatsam mungga jaw ai hta, “KIO hpung shang salang ni yawng gaw amyu sha ni hpe kahkyin gumdin ra ai, tinang a hpung pati grau nna  grenggrak wa na gaw, anhte yawng hta lit nga ai re. KIO a lam masan da ai kata, gawda tara ni hpe grau chye na hkawnhkrang wa hkra grau nna hka ja ra nga ga ai”  nga nna tsun ai.

“Wunpawng Mungdan Shanglawt hpung shang masha langai rai sai majaw ntsa tsang kaw nna masat jahkrat dat ai tara ni hpe hkannang hkansa let, amyusha rawt jat galu kaba wa na lam hta shanglawm shakut shaja gunhpai sa wa na re” nga nna shingnan hpung shang masha rai nga ai Salang Marip Shan Lum tsun ai.

Hpawng hta shingnan hpung shang masha lakmat shagrau hkamla ai ni gaw, Masat (2) Dap Nawng Daju Pati Komiti kaw na marai 9, Masat (1) Laknak Kaba Dap Ba Pati Komiti kaw na marai 3 hte Laksan Laiza Muklum Pati Komiti kaw na marai 33, yawng marai 45 re lam chye lu ai.