Hpaji jawng wang kaw hpungkyi jawng galaw wa ai majaw, mare masha ni hte manghkang byin
Photo Credit; KNG
Mugawng, Loili Yang mare masha ni a hpaji jawng lamu ga wang kaw, hpungkyi jawng gawgap wa ai majaw, buga mare masha ni hte manghkang byin nga ai lam chye lu ai.
Mabyin lawng lam seng nna Loili Yang mare salang Dumsa Ah Sha hpe matut mahkai san yu ai hta “Ya na zawn byin ai lam gaw mare salang (ရာအိမ္မွဴး)U Win Chyai ngu ai wa salang galaw ai ahkaw ahkang hpe lang nna, hpung makam masham ladat hku galaw wa ai lam re” nga nna tsun ai.
U Win Chyai woi awn ai hpung ni gaw mare masha ni hte jahkrup ai lam nnga ai sha Loili Yang hpaji jawng wang hpe hpri ju hte sa kum maden ai lam galaw ai re hpe chye lu ai.
Ndai lamu ga hte seng nna mare masha ni, Asuya hte Mugawng mare uphkang rung de tang shawn ai lam nga ai raitim, ahkyak la galaw ya ai lam nnga ai sha n ga, kata lam jahkrup la na hku sha tsun ai re hpe chye lu ai.
Loili Yang hpaji jawng wang hta jawng gaw gap da sai raitim, jawng sara/num ni hpe shaga na matu, ja gumhpraw yakhkak ai majaw, jawng nlu hpaw shi ai lam chye lu ai.
Ndai lamu ga gaw Eka 5 rai nna, shaning 100 ning daram kawn buga mare masha ni a lamu ga re majaw, matut nna mung mare masha ni a jawng wang lamu ga sha byin na hpe ra sharawng ai lam chye lu ai.
