Masat yan (16) Mungkan a ninghtoi sasana jawng yu sai jawngma ni hpe masat lakmat shagrau hpawng galaw
Waimaw Ginwang Shamai Shatsai Sasana Magam Dap hte Pat Jasan Komiti ni kaw nna lit la hpaw sharin ya ai, Masat Yan (16) Mungkan a ninghtoi sasana jawng yu hpawng hpe Waimaw Ginwang Muk Chyit Buga Mungkan a ninghtoi sasana jawng wang kaw October shata 12 ya jahpawt hkying 10:00am aten hta galaw la lu sai lam na chye lu ai.
Lamang hta Jawng yu sai jawngma ni marai 12 hpe masat lakmat shagrau ai, nawku daw jau ai lamang galaw ai lam, jawng hta sharin ya ai sharin ginhpan ni gaw Chyum Mungga, Shakawn Mahkawn, Music, Hkamja lam, tara upadi, Kachin Grammar, hkum gawng shakyang, ginsup hpan ni, hkai lu hkai sha rem lu rem sha, myit masin akyang lai len hte seng ai lam ni hpe sharin ya ai.
Mungkan a Ninghtoi Sasan jawng hpaw sharin ai lam gaw ka-ni nanghpam lu sha hta len nga ai wunpawng amyusha ni hte wenyi lam hta hkrat sum nga ai hpunau ni hpe hkye mawoi mayu ai magam bungli madung yaw shada ai re lam, Mungkan a ninghtoi sasana jawng sharin Sara Lahtung Lum Dau tsun dan ai.
Mungkan a ninghtoi sasana jawng hta hpung makam masham, masha amyu garan ginghka ai lam nnga ai sha, nanghpam malu masha hpe dawn jasan hkam la mayu ai kadai hpe raitim, mying jahpan ding yang hkap la nga ai rai nna, COVID-19 ana zinli byin nga aten ladaw re majaw masha jen jep ai lam hpe galaw nna, hkap la sharin ya ai re lam chye lu ai.
Ya aten Masat yan (17) Mungkan a ninghtoi sasana jawng hta jawngma ni marai 26 sharin hkam la nga ai rai nna, jawng hpe Waimaw Ginwang kata na buga hpung ni myit hkrum let, laiwa sai 2014 ning February shata praw 5 ya shani kaw nna hpaw hpang wa ai hta jawng yu ai jawngma ni marai 600 daram du sai lam chye lu ai.
