Hpakant Municipal Salang hpe Mungdaw Asuya kaw nna tara nshang ai hku bai galai lata san da ai majaw mungshawa ni ninghkap laika bang
Hpakant Muklum Municipal Salang lata san da hkrum sai Salang Sharaw Naw San a shara kaw Jinghpaw Mungdaw Asuya kaw nna U Min Min Soe hpe bai galai shatsam ai majaw, Hpakant ginra kata na CSO wuhpung wuhpawng ni kaw nna Hpakant Ginwang Htunghking Rung kaw October shata 12 ya shani zuphpawng galaw nhtawm, Jinghpaw Mungdaw Asuya hpang de ninghkap laika bang da ai lam na chye lu ai.
Hpakant Muklum Municipal Salang shara lata da hkrum ai masha marai 8 hpe Jinghpaw Mungdaw Asuya kaw tang madun ai hta, Salang Sharaw Naw San gaw Hpakant Muklum Municipal Salang shara galaw na matu Me dang da ai raitim, Mungdaw Asuya kaw nna bai jahkrat ya ai gaw Salang Sharaw Naw San hpe Me sum ai NLD Party kaw na U Min Min Soe hpe Salang wa a shara kaw bai shatsam wa ai majaw, Hpakant Muklum kata nga ai mungshawa ni hku nna n tara ai lam hpe nra sharawng ai nga nna Mungdaw Asuya hpang de ninghkap laika bang da sai rai nna, Mungdaw Asuya kaw nna ya na zawn galaw sa wa ai a ntsa Wunpawng Amyusha Zinlum Hpung Ningbaw Sara Lamawng La Tawng tsun ai.
“Sharaw Naw hpe hpa majaw njaw ai, Jinghpaw re majaw kun?, shing nrai NLD hpung shang masha nre ai majaw, njaw ai kun? ngu anhte dai hku mu lu ai, amyu mi hku tsun ga nga yang sharaw naw hpe sha roi ai nre, anhte Jinghpaw Wunpawng amyusha ni yawng hpe roi ai re ngu mu mada ai. Bawngban jahkrum nna Dr. Hkyet Awng woi awn ai Asuya de ninghkap laika bang ai re” nga nna tsun ai.
Salang Sharaw Naw San a mabyin hpe mahta nna Hpakant ginra kata na CSO wuhpung wuhpawng ni rai nga ai, Wunpawng Amyusha Zinlum Hpung, Wunpawng Htunghking Hpung, Ka-ni Nanghpam Pat Jasan Hpung, Wunpawng Shingni Hpung, Rudi Ru Hpang Hpung hte Green Land wuhpung wuhpawng ni kaw na amyusha ni a shinggyim ahkaw ahkang lam, amyu sha hte seng ai lam, lamu ga hte seng ai lam ni hpe wunpawng amyusha yawng a gawng malai tai nna hparan hpareng ya na komiti langai hpaw na matu myit hkrum shagrin da sai lam, Amyusha Zinlum Hpung Amu Madu Sara Dashi Naw Lawn tsun dan ai kaw na chye lu ai.
Salang Sharaw Naw San hpe n tara ai hku nna galaw ai lam gaw, wunpawng amyusha yawng hpe amyu kaba lailen lang nna dasang galaw ai lam re ai majaw, amyusha ni mung myit yu mang yu nna ninghkap ang ai hpe ninghkap let mungshawa yawng shanglawm sa wa ga nga nna Sara Lamawng La Tawng tsun lajin da ai re.
