Woi Chyai Hpyen Yen Lawu Tsang jawngma ni lata kashin shingjawng lamang galaw
Woi Chyai Hpyen Yen Lawu Tsang Jawng Hkamja Komiti kaw nna woi awn nhtawm, October shata 15 ya shani ang ai Mungkan tashin masat ninghtoi hpe masat masa galaw ai hku nna jawngma ni a lata kashin shingjawng lamang hpe October 16 ya jahpawt hkying 9:00am aten hta Woi Chyai Hpyen Yen Lawu Tsang Jawng wang kaw galaw la lu sai re.
Jawngma ni lata atsawm sha chye kashin wa na matu hte COVID-19 ana zinli hpe ladat jaw jaw hte makawp maga chye na matu yaw shada ai re lam, Woi Chyai Hpyen Yen Lawu Tsang Jawng Up Saranum Kaba Maru Tangbau Pri Seng tsun ai.
Lamang hta Hkamja komiti kaw nna shatsam da ai saranum ni marai 4 kaw nna tara agyi tai let shingjawng lawm ai jawngma ni hpe masat jaw ya ai re.
KG jawngma A, B, C pang ni gaw lata kashin mahkawn hte ka shingjawng ai rai nna, tsang 1 jawngma ni gaw lata kashin ai ladat hpe hka nlawm ai sha shingjawng ai lamang galaw ai hte tsang 2, 3 ,4 jawngma ni gaw hka, sabya hte lata kashin shingjawng ai lamang hpe galaw ai re lam, shingjawng lamang hta masat 1, 2, 3 lu ai jawngma ni hpe masat kumhpa shagrau ai rai nna, shanglawm shingjawng ai jawngma ni hpe mung shanglawm kumhpa jaw ai re.
Mungkan lata kashin masat ninghtoi lamang hpe masat masa galaw ai hku nna laiwa sai shaning hta lamang hpe kaji ai hku galaw ai raitim, daining gaw ana zinli byin nga ai aten ladaw re majaw, ta kashin ai hpe madung dat nna galaw ai re lam, ya aten Woi Chyai Hpyen Yen Lawu Tsang Jawng hta jawng sara/num ni marai 25 hte laika hpaji sharin hkam la nga ai jawngma yawng marai 233 nga ai lam chye lu ai.
