Maw Han buga kaw akyu hpyi bum galaw sa wa lu na matu hkyen lajang nga
Kutkai Ginwang, Maw Han buga KBC nawku hpung ni kaw nna woi awn let Maw Han buga hpung wang kaw, akyu hpyi bum galaw sa wa lu na matu hkyen lajang nga ai lam chye lu ai.
“Kyu hpyi bum galaw hpang sa wa ai lam gaw anhte buga hta kyu hpyi bum nan mung ra nga ai hta, dinghkrai lam, wuhpung lam, myusha lam yan hku na mi rai rai karai kasang kaw akyu hpyi hkamla lu na matu hte kaga hkristan ni mung akyu hpyi hkamla mai na matu ngu yaw shada let galaw hpang sa wa ai re” nga nna Maw Han buga Rev. Lahtaw Zau Gam tsun ai.
Hpung wang hta akyu hpyi bum garai n galaw shi ai sha, Udang hpe shawng ningnan jun sa wa lu na matu October shata 17 ya shani hta shara masat jahkrat da lu sai re.
COVID-19 ana zinli a majaw, ja gumhpraw yak hkak ai lam nga ai re hte Ya aten du hkra tatut galaw sa wa ai lam nnga shi ai raitim Udang hpe shawng ningnan jun da lu na matu hkyen lajang nga ai re.
Ndai udang galaw sa wa ai lam hpe nawku hpung kaw nna woi awn let hpung masha ni hte rau akyu hpyi apnawng la nhtawm udang shajun na matu foundation jahkrat ai lam hpe galaw lu hkra hkyen lajang nga ai lam, Rev.Lahtaw Zau Gam matut tsun dan ai.
Maw Han mare hta sam, miwa hte kaga nawku hpung ni, htinggaw (500) jan daram nga ai hta hkristan hpung masha htinggaw (200) jan daram nga ai re hpe mung chye lu ai.
