Hpakant Municipal Salang galai shatsam ai hte seng nna WMR kaw nna Jinghpaw Mung Asuya hpang de hpaji jaw laika bang
Hpakant Muklum Municipal Salang lata san da hkrum sai Salang Sharaw Naw San a shara kaw Jinghpaw Mung Asuya gaw U Min Min Soe hpe galai shatsam ai lam hte seng nna Wunpawng Amyusha Mungbawng Rapdaw (WMR) kaw nna Jinghpaw Mung asuya hpang de October shata 19 ya shani hpaji jaw laika bang ai lam na chye lu ai.
Jinghpaw Mungdaw Asuya hpang de hpaji jaw laika bang ai yaw shada lam gaw, Democracy masa, National Reconciliation, Fedral mung hpawm masa de sa wa ai shaloi asuya hte mungshawa gahkyin gumdin lam gaw grai ahkyak ai ngu mu mada ai lam, Hpakant gin ra hta ya na zawn byin ai majaw asuya hpe mungshawa ni myit npyaw, kam hpa lam yawm wa ai lam nbyin na matu hte grau hkrak ai hku woi awn sa wa lu na matu hpaji jaw laika bang ai re lam, WMR tsun a hkang lu Sara Nhkum Tang Gun ya na zawn tsun ai.
“Anhte mungshawa ni kata kaw mung teng man ai lam jaw ai lam tara rap ra lam ngu ai masa gaw gara hku rai yang mai lu na mai byin na ngu ai hpe mung shawa ni mung yawng mu chyalu re. Dai majaw ndai zawn re lam a matu galoi mung hpaji jaw hkat myit hkrum lam jawm gawgap nna galaw sa wa yang, mungshawa ni ra sharawng ai tara rap ra lam mung lu la wa na re” nga nna tsun dan ai.
Jinghpaw Mungdaw asuya kaw nna Hpakant Municipal salang bai galai shatsam ai hpe Hpakant ginra kata nga ai mungshawa ni nra sharawng ai majaw, lai wa sai October shata 12 ya shani hta mung, Hpakant ginra kata nga ai CSO wuhpung wuhpung ni kaw nna Mungdaw Asuya hpang de ninghkap laika bang da ai re.
