Kutkai chyum jawng hpaw sa wa na lam ndau laika shapraw
Jinghpaw Wunpawng chyum hkawlik, Kutkai a 2020-2021 ning jawng lung ladaw hpe December 28 ya shani kaw nna jawng lung hpang sa wa na re majaw October 21 ya shani kaw nna jawngma ningnan hkap la ai lam hpe galaw sa wa na re lam ndau laika shapraw da ai re.
M.Div I, M.Min I, B.Th I, L.Th I, C.Th I, CCM I hte Dip CM I lung na jawngma ni gaw December 28 ya shani kaw nna jawng laika sharin hpang sa wa na re majaw October 21 ya shani kaw nna December 20 ya shani du hkra hpang jahtum jawng mying hkap la sa wa na re.
B.Th IV, L.Th IV, C.Th III hte B.Min I-II pang ni hpe September 21 ya shani kaw nna online kaw nna sharin hpang nga sai rai nhtawm Liberal Arts program ni rai nga ai CCM, Dip CM hte Certificate in English language ni hpe gaw October 21 ya shani kaw nna online hte hpaw hpang sa wa na re.
Dai ning na COVID-19 kap bra ana zinli a majaw mungshawa ni yawng hkawmsa hkawmwa yak hkak ai rai nna Kutkai chyum jawng a 2020-2021 jawng lung shaning na jawngma ningnan ni yawng hpe jawng shang san poi (Entrance Examination) nnga na re. Jawng shang hpyi shawn laika du ai jawngma ni yawng hpe hkap la sa wa na re lam chye lu ai.
Ndau laika hta jawng jarik manu hpe du wa na ten ni hta ndau shana sa wa na re lam tsun da ai.
Jawng shang hpyi shawn hkrang laika pa hpe kutkai chyum jawng page kaw nna mai la sai hte Email: Lsenghpung@gmail.com, Page messanger ni hta (Application form) hpe shagun hpang mai sai lam,ndau laika hta tang madun da ai.
