Ningawn Mungmasa ningmu jahpaw hkaja hpawng galaw
Laiza Muklum Pati Komti kaw nna woi awn galaw ai Ninggawn Mungmasa ningmu jahpaw hkaja hpawng hpe October shata 21 ya shani kaw nna 23 ya shani du hkra Laiza Hotel kaw galaw na lam chye lu ai.
Hpawng hta Ningtau Ninggawn Amu Madu Salang Kaba Labang Doi Pyi Sa kaw nna Ninggawn Mungmasa lam yan hte seng ai lam hpe madung woi hkaja ai re.
Laiza Muklum kata ramma jahpan 2200 jan nga ai raitim, KIO hpung pati shang ramma hte tatut shang lawm shamu shamawt nga ai ramma jahpan grai shai taw ai majaw, ramma ni hpung pati hte seng ai lam hpe grau nna shang lawm wa hkra ninggawn mungmasa gaw madung re ngu ai hpe ramma ni chye na hkawn hkrang wa nna tatut shanglawm shamu shamawt wa lu na matu yaw sada let, Mulklum kata shanu nga ai asak 18-35 ning lapran na ramma ni hpe madung tawn nna, ninggawn mungmasa ningmu jahpaw hpawng hpe galaw ai re lam, Laiza Muklum Uphkang Du, Laiza Muklum Pati Komiti Tingnyang Up Salang Kaba Wala Lahtaw Gum Ja Du tsun dan ai.
“Anhte Wunpawng ramma ni yawng gaw myutsaw myit rawng ai hkrai hte shang lawm ai hkrai gaw rai na re, raitim mung ninggawn mungmasa lam yan gaw anhte a tsaw dik mungmasa lam yan hpe grau nna chye na hkawn hkrang let myit su myit rawt hte shanglawm shamu shamawt n-gun tai na matu galaw sa wa ai lam hta yawng shang lawm galaw na grai ahkyak ga ai” nga nna tsun ai.
Ninggawn Mungmasa ningmu jahpaw hkaja hpawng hta Laiza Muklum kata na ramma ni marai 5o sa du shanglawm hkaja nga ai lam, Laiza Muklum Pati Komiti kaw nna Muklum kata shanu nga ai ramma ni hpe ninggawn mungmasa woi hkaja ai gaw ndai lang nambat langai lang galaw re hte matut nna mung pang hte pang galaw sa wa na masing nga ai lam chye lu ai.
